Feilsøking i eit Basic-program
Brotpunkt og stegvis utføring
Du kan feilsøkja kvar linje for seg i eit Basic-program ved å køyra programmet steg for steg. Der er då lett å spora feil ettersom du kan sjå resultatet for kvart steg. Den gjeldande linja vert merkt med ein markør. Du kan også setja inn eit brotpunkt viss du vil avbryta utføringa på ein bestemt stad i programmet.
Dobbeltklikk på kolonnen brotpunkt til venstre i redigeringsvindauget for å slå brotpunktet for den gjeldande linja av eller på. Programmet vert avbrote når det kjem til eit brotpunkt.
Du kan følgja programmet steg for steg gjennom prosedyrar og funksjonar ved å klikka på knappen Stegvis.
Køyrer du programmet via knappen Prosedyresteg, vert kvar prosedyre og funksjon handsama som eitt enkelt steg.
Eigenskapar for eit brotpunkt
Eigenskapane for eit brotpunkt er tilgjengelege ved å høgreklikka på brotpunktet i brotpunktkolonnen.
Du kan slå på og slå av eit brotpunkt ved å velja Aktiv på snarmenyen. Eit brotpunkt som er slått av bryt ikkje av programkøyringa.
Vel Eigenskapar frå sprettoppmenyen for eit brotpunkt eller vel Brotpunkt frå lokalmenyen for brotpunktkolonnen for å opna dialogvindauget for Brotpunkt der du kan setja innstillingane for brotpunktet.
Lista viser alle brotpunkta med tilhøyrande linjenummer i kjeldekoden. Du kan slå eit brotpunkt av eller på ved å fjerna eller setja merket for Aktiv.
Passeringsteljar viser kor mange gongar programmet kan passera over eit brotpunkt før programmet vert stoppa. Skriv du inn 0 her (standard), vil programmet alltid stoppa ved brotpunktet.
Trykk Slett for å fjerna eit brotpunkt frå programmet.
Sjå variabelverdiar
Du kan sjå verdien av ein variabel ved å leggja han til i feltet Overvak. Du legg til ein variabel i lista ved å skriva variabelnamnet i innskrivingsfeltet Overvak og trykkja Enter.
Verdiane for variablar vert viste berre viss dei er relevante i området. Variablar som ikkje er definerte i den gjeldande kjeldeteksten, viser «Out of Scope» i staden for ein verdi.
Du kan også ta med tabellar i overvakingsfeltet. Viss du skriv inn namnet på ein tabell utan indeksverdi i overvakingsfeltet, vert innhaldet av heile tabellen vist.
Viss du held musepeikaren over ein førehandsdefinert variabel i redigeringsvindauget medan programmet køyrer, vert innhaldet av variabelen vist i eit sprettopp-vindauge.
Kall-vindauget
Dette dialogvindauget viser ei oversikt over hierarkiet over kall av prosedyrar og funksjonar. Du kan finna ut kva for prosedyrar og funksjonar som har kalla kva for andre prosedyrar og funksjonar på det gjeldande punktet i kjeldekoden.