Pomoc za LibreOffice 24.8
LibreOffice Writer wam zmóžnja, tekstowe dokumenty naćisnyć a wutworić, kotrež móža grafiki, tabele abo diagramy wobsahować. Móžeće potom dokumenty we wjele formatach składować, mjez nimi standardizowany format OpenDocument (ODF), format Microsoft .doc abo HTML. A móžeće swój dokument lochko do formata Portable Document Format (PDF) eksportować.
LibreOffice Writer wam zmóžnja jednore dokumenty kaž mema faksy, listy, zamołwjenja a serijowe listy kaž tež dołhe a kompleksne abo wjacedźělne dokumenty z literaturnymi zapisami, referencnymi tabelemi a hesłarjemi.
LibreOffice Writer tež tajke wužitne funkcije kaž prawopisnu kontrolu, tezawrus, awtomatisku korekturu a dźělenje złóžkow a nimo toho wjele předłohow za nimale kóždy zaměr wobsahuje. Móžeće tež swójske předłohi z asistentami wutworić.
LibreOffice wjele móžnosćow za wuhotowanje dokumentow skići. Wužiwajće wokno Předłohi, zo byšće předłohi za wotstawki, jednotliwe znamješka, wobłuki a strony wutworił, připokazał a změnił. Nimo toho Nawigator wam pomha, so spěšnje we wašich dokumentach pohibować, zmóžnja wam, sej waš dokument w rozrjadowanskim napohledźe wobhladać a wobchowuje přehlad nad objektami, kotrež sće do swojeho dokumenta zasadźił.
Móžeće tež wšelake zapisy a tabele w tekstowych dokumentach wutworić. Móžeće strukturu a napohlad zapisow a tabelow po swojich wosobinskich potrěbnosćach definować. Z aktiwnymi hyperwotkazami a zapołožkami móžeće direktnje k wotpowědnym městnam w teksće skočić.
LibreOffice Writer wjele DTP- a rysowanske nastroje wobsahuje, kotrež wam pomhaja, profesionelnje wuhotowane dokumenty kaž na přikład brošurki, newslettery abo přeprošenki wutworić. Móžeće swoje dokumenty we wjacorych špaltach, z wobłukami, grafikami, tabelemi a druhimi objektami formatěrować.
Tekstowe dokumenty w LibreOffice maja integrowanu ličensku funkciju, kotraž wam pomha, naročne wobličenja abo logiske zwjazanja wuwjesć. Móžeće lochko tabelu w tekstowym dokumenće wutworić, zo byšće wobličenja přewjedł.
Rysowanski nastroj LibreOffice Writer wam zmóžnja, rysowanki, grafiki, legendy a druhe typy rysowankow direktnje w tekstowych dokumentach wutworić.
Móžeće wobrazy z rozdźělnymi formatami do tekstoweho dokumenta zasadźić, mjez nimi grafiki w formaće JPG abo GIF. Nimo toho skići Galerija zběrku clipartow a galerija Fontwork wulkotne pismowe efekty wutwori.
Programowy powjerch je tak naćisnjeny, zo móžeće jón po swojich nastajenjach konfigurować, mjez druhim móžeće symbole a menije přiměrić. Móžeće wšelake programowe wokna pozicioněrować, na přikład wokno Předłohi abo Nawigator jako znošowace so wokno něhdźe na wobrazowce. Móžeće tež někotre wokna ke kromje dźěłoweho wobłuka přidokować.
Funkcija Ćahnyć a pušćić wam zmóžnja, spěšnje a eficientnje z tekstowymi dokumentami w LibreOffice dźěłać. Móžeće objekty, na přikład grafiki z galerije, wot jednoho městna do druheho w samsnym dokumenće abo mjez wočinjenymi dokumentami LibreOffice ćahnyć a pušćić.
Móžeće system pomocy jako dospołnu referencu za nałoženja LibreOffice wužiwać, mjez nimi instrukcije za jednore a kompleksne nadawki.