Wusměrjenje strony změnić

Wšě kajkosće strony za tekstowe dokumenty Writer, na přikład wusměrjenje strony, so přez předłohi strony definuja. Po standardźe nowy tekstowy dokument předłohu strony „Standard“ wužiwa. Jeli eksistowacy tekstowy dokument wočinjeće, su snano hižo rozdźělne předłohi strony na rozdźělne strony nałožene.

Je wažnje wědźeć, zo so změny, kotrež na kajkosć strony nałožujeće, jenož na strony wuskutkuja, kotrež aktualnu předłohu strony wužiwaja. Aktualna předłoha strony so w statusowej lajsće na delnjej kromje wokna pokazuje.

Wusměrjenje strony na wšě strony nałožić

Jeli so waš tekstowy dokument jenož ze stronow ze samsnej předłohu strony zestaja, móžeće kajkosće strony direktnje změnić:

1. Wubjerće Format – Předłoha strony….

2. Klikńće na rajtark Strona.

3. Wubjerće pod Papjerowy format „Wysoki format“ abo „Prěčny format“.

4. Klikńće na W porjadku.

Wusměrjenje strony jenož za někotre strony změnić

LibreOffice předłohi strony wužiwa, zo by wusměrjenje stronow w dokumenće postajił. Předłohi strony wjace kajkosćow strony definuja, kaž na přikład hłowowu a nohowu linku abo kromy strony. Móžeće pak předłohu strony „Standard“ za aktualny dokument změnić, abo móžeće swójske předłohi strony definować a te předłohi strony na dźěle swojeho teksta nałožić.

Na kóncu tuteje strony pomocy budźemy rozsah płaćiwosće předłohow strony nadrobnje diskutować. Jeli sej wo koncepće předłohi strony wěsty njejsće, čitajće prošu wotrězk na kóncu tuteje strony.

Zo byšće wusměrjenje strony za wšě strony změnił, kotrež samsnu předłohu strony wužiwaja, trjebaće najprjedy předłohu strony a móžeće potom tu předłohu nałožić:

1. Wubjerće Napohlad – Formatowe předłohi.

2. Klikńće na symbol Předłohi strony.

3. Klikńće z prawej tastu na předłohu strony a wubjerće Nowy. Nowa předłoha strony wšě kajkosće wubraneje předłohi strony dóstanje.

4. Zapodajće na rajtarku Powšitkowne mjeno za předłohu strony w polu Mjeno, na přikład „Mój prěčny format“.

5. Wubjerće w polu Přichodna předłoha předłohu strony, kotruž chceće na přichodnu stronu nałožić, kotraž stronje z nowej předłohu slěduje. Hlejće wotrězk wo rozsahu płaćiwosće předłohow strony na kóncu tuteje strony pomocy.

6. Klikńće na rajtark Strona.

7. Wubjerće pod Papjerowy format „Wysoki format“ abo „Prěčny format“.

8. Klikńće na W porjadku.

Nětko sće předłohu strony z mjenom „Mój prěčny format“ definował. Zo byšće nowu předłohu nałožił, klikńće na nowu předłohu a klikńće dwójce na předłohu strony „Mój prěčny format“ we woknje Předłohi. Wšě strony w aktualnym rozsahu płaćiwosće předłohow strony so změnja. Jeli sće druhu předłohu jako „přichodnu předłohu“ definował, so jenož prěnja strona aktualneho rozsaha płaćiwosće předłohow strony změni.

Spěšnje mjez wysokim a šěrokim formatom přepinać

Standardna dokumentowa předłoha, kotruž LibreOffice Writer k dispoziciji staja, wjacore předłohi strony skići, z kotrychž předłoha strony Standard ma wusměrjenje Wysoki format a předłoha strony Prěčny format wusměrjenje prěčny format.

Tutej předłoze datej so wužiwać, zo byštej mjez wysokim a prěčnym formatom přepinałoj, hdyž manuelne łamanja zasadźujeće a přihódnu předłohu strony kaž deleka wopisane wuběraće:

1. Stajće kursor tam, hdźež so ma łamanje strony zasadźić.

2. Wubjerće Zasadźić – Dalše łamanja – Manuelne łamanje…. Dialog Łamanje zasadźić so wočini.

3. Wubjerće nastajenje Łamanje strony a we wuběranskej lisćinje Předłoha strony předłohu strony, kotraž so ma na stronu za łamanjom (předłoha strony Standard, prěčny format atd.) nałožić.

4. Jeli nałožene dyrbi so na wěstym městnje w dokumenće znowa změnić (na přikład dokelž chceće so wot prěčneho do wysokeho formata wróćić), stajće kursor na tute městno a wospjetujće do toho wopisane kroki.

Rozsah płaćiwosće předłohow strony

Je wažnje, zo rozsah płaćiwosće předłohow strony w %PRODUCTMAME znajeće. Kotre strony wašeho tekstoweho dokumenta su přez wobdźěłowanje předłohi strony potrjechene?

Předłohi za jednotliwu stronu

Předłoha strony da so definować, kotraž jenož jednu stronu wobjima. Předłoha „Prěnja strona“ je přikład. Definujće druhu předłohu strony jako „přichodnu předłohu“ na rajtarku Format – Předłoha strony… – Powšitkowne, zo byšće tutu kajkosć nastajił.

Předłoha strony za jednotliwu stronu so wot delnjeje kromy wobłuka aktualneje předłohi strony hač k přichodnemu łamanju saha. Přichodne łamanje strony so awtomatisce zjewi, hdyž tekst do přichodneje strony běži. Tajke łamanje so druhdy „mjechke łamanje strony“ mjenuje. Abo móžeće manuelne łamanje strony zasadźić.

Zo byšće manuelne łamanje strony na poziciji kursora zasadźił, tłóčće +Enter abo wubjerće Zasadźić – Dalše łamanja – Manuelne łamanje… a klikńće prosće na W porjadku.

Rozsah płaćiwosće za předłohu strony postajić

Předłoha strony „Standard“ na Format – Předłoha strony… – rajtark: Powšitkowne druhu „přichodnu předłohu“ njenastaja. Město toho so „přichodna předłoha“ tež na „Standard“ staja. Wšě předłohi strony, kotrymž samsna předłoha strony slěduje, móže wjacore strony wobjimać. Niše a wyše ramiki wobłuka předłohi strony so přez „łamanja strony z předłohu“ definuja. Wšě strony mjez dwěmaj „łamanjomaj strony z předłohu“ samsnu předłohu strony wužiwaja.

Móžeće „łamanje strony z předłohu“ direktnje na poziciji kursora zasadźić. Abo móžeće kajkosć „łamanje strony z předłohu“ na wotstawk abo wotstawkowu předłohu nałožić.

Wuwjedźće jedyn ze slědowacych krokow:

• Zo byšće „łamanje strony z předłohu“ na poziciji kursora zasadźił, wubjerće Zasadźić – Manuelne łamanje…, potom mjeno předłohi z lisćinoweho pola a klikńće na W porjadku.

• Zo byšće kajkosć „łamanje strony z předłohu“ na aktualny wotstawk nałožił, wubjerće Format – Wotstawk… – rajtark: tekstowy běh. Aktiwizujće we wobłuku łamanjow Zasadźić a Z předłohu strony. Wubjerće mjeno předłohi strony z lisćinoweho pola.

• Zo byšće kajkosć „łamanje strony z předłohu“ na aktualnu wotstawkowu předłohu nałožił, klikńće z prawej tastu na aktualny wotstawk. Wubjerće Wotstawkowu předłohu wobdźěłać z kontekstoweho menija. Klikńće na rajtark Tekstowy běh. Aktiwizujće we wobłuku łamanjow Zasadźić a Z předłohu strony. Wubjerće mjeno předłohi strony z lisćinoweho pola.

• Zo byšće kajkosć „łamanje strony z předłohu“ na někajkužkuli wotstawkowu předłohu nałožił, wubjerće Napohlad – Formatowe předłohi. Klikńće na symbol Wotstawkowe předłohi. Klikńće z prawej tastu na mjeno wotstawkoweje předłohi, kotruž chceće změnić a wubjerće Předłohu wobdźěłać…. Klikńće potom na rajtark Tekstowy běh. Aktiwizujće we wobłuku łamanjow Zasadźić a Z předłohu strony. Wubjerće mjeno předłohi strony z lisćinoweho pola.