Zapiski (zapis wobsaha)

Podajće format zapiskow w zapisu wobsaha.

Přistup k tutomu přikazej …

Wubjerće Zasadźić – Zapis wobsaha a hesłar – Zapis wobsaha, hesłar abo literarny zapis… – Rajtark: Zapiski (hdyž zapis wobsaha je wubrany typ)

Runina

Wubjerće runinu, kotruž chceće definować.

Struktura a formatěrowanje

Linka Struktura definuje, kak su zapiski w zapisu zestajene. Zo byšće napohlad zapiska změnił, móžeće kody abo tekst do prózdnych polow na tutej lince zapodać. Móžeće tež do prózdneho pola abo na kod kliknyć a potom na kodowe tłóčatko.

Zo byšće kod z linki Struktura zhašał, klikńće na kod a tłóčće potom tastu Entf na swojej tastaturje.
Zo byšće kod z linki Struktura wuměnił, klikńće na kod a potom na kodowe tłóčatko.

Zo byšće lince Struktura kod přidał, klikńće do prózdneho pola a potom na kodowe tłóčatko.

Čisłowanje (N#)

Zasadźuje nadpismowe čisło abo lisćinowe čisło zapiska. Zo byšće nadpismowe čisłowanje zmóžnił, wubjerće Nastroje – Nadpismowe čisłowanje….

Zapiskowy tekst (E)

Zasadźuje tekst wubraneho zapiska.

Tabulator (T)

Zasadźuje tabulator. Zo byšće tabulatorej nawodne dypki přidał, wubjerće znamješko w polu Pjelnjenske znamješko. Zo byšće poziciju tabulatora změnił, zapodajće hódnotu w polu Tabulatorowa pozicija abo wubjerće kontrolny kašćik Naprawo wusměrić.

Čisło strony (#)

Zasadźuje čisło strony zapiska.

Hyperwotkaz (LS a LE)

Wutworja hyperwotkaz za dźěl zapiska, kotryž z wočinjacej (LS) a začinjacej (LE) značku hyperwotkaza wobdawaće. Klikńće na lince Struktura do prózdneho pola před dźělom, za kotryž chceće hyperwotkaz wutworić a klikńće potom na tute tłóčatko. Klikńće do prózdneho pola za dźělom, kotremuž chceće hyperwotkaz přidać a potom znowa na tute tłóčatko. Wšě hyperwotkazy dyrbja jónkróćne być.

Wšě

Nałožuje aktualne nastajenja na wšě runiny, bjeztoho zo by so dialog začinił.

Znamješkowa předłoha

Podajće znamješkowu předłohu za wubrany symbol w lince Struktura.

Wobdźěłać

Wočinja dialog, hdźež móžeće wubranu znamješkowu předłohu wobdźěłać.

Přichodne tři nastajenja su k dispoziciji, hdyž so symbol T wuběra.

Pjelnjenske znamješko

Wubjerće tabulatorowe pjelnjenske znamješko, kotrež chceće wužiwać.

Tabulatorowa pozicija

Zapodajće wotstup, kotryž so ma mjez lěwej kromu strony a tabulatorom wostajić.

Naprawo wusměrić

Wusměrja tabulator na prawej kromje strony.

Přichodnej dwě nastajeni stej k dispoziciji, hdyž so symbol N# wuběra.

Format

Jenož widźomny, hdyž na tłóčatko N# w lince Struktura klikaće. Wubjerće to, zo byšće nadpismowe čisło z dźělatkom abo bjez dźělatka pokazał.

Hač do runiny pokazać

Zapodajće maksimalnu ličbu runinow nadpismoweho čisła, kotrež so maja pokazać. Wubjerće na přikład „3“, zo byšće hač do třoch runinow pokazał. Jeli nadpismowe čisło ma mjenje hač tři runiny, so woprawdźite čisło pokaza.

Format

Tabulatorowa pozicija relatiwna k zasunjenju wotstawkoweje předłohi

Pozicioněruje tabulator relatiwnje k hódnoće „Zasunjenje wotlěwa“, kotraž je we wotstawkowej předłoze na rajtarku Předłohi definowana. Hewak so tabulator relatiwnje k lěwej tekstowej kromje pozicioněruje.