Lěpjate dypki wužiwać

W Impress a Draw móžeće přeco dwaj twaraj z liniju z mjenom zwjazowak zwjazać. Hdyž zwjazowak mjez twaromaj rysujeće, so zwjazowak k lěpjatemu dypkej kóždeho twara připowěša. Kóždy twar ma standardne lěpjate dypki, a pozicije standardnych lěpjatych dypkow wot wotpowědneho twara wotwisuja. Móžeće twarej swójske lěpjate dypki přidać a potom zwjazowaki k swójskim lěpjatym dypkam připowěsnyć.

Zo byšće lěpjate dypki přidał a wobdźěłał:

1. Přewjedźće jedyn ze slědowacych krokow, zo byšće eksistowace lěpjate dypki za wšě elementy widźomne činił:

• Klikńće na symbol Lěpjate dypki w symbolowej lajsće Rysowanka; abo

• Wubjerće Wobdźěłać – Lěpjate dypki.

2. Klikńće na symbol Lěpjaty dypk zasadźić w symbolowej lajsće Lěpjate dypki.

3. Wubjerće element na foliji, hdźež chceće lěpjate dypki přidać.

4. Klikńće w twarje, hdźež chceće nowy lěpjaty dypk přidać.

   Jeli twar je wupjelnjeny, móžeće něhdźe w twarje kliknyć. Jeli twar je njepjelnjeny, móžeće na ramik kliknyć, zo byšće lěpjaty dypk zasadźił. Hdyž sće jón zasadźił, móžeće lěpjaty dypk do druheje pozicije w twarje ćahnyć.

Ze štyrjomi symbolemi pódla symbola Lěpjaty dypk zasadźić, móžeće směry wubrać, kotrež su za zwjazowak na tutym lěpjatym dypku dowolene. Móžeće jedyn směr abo wjacore směry za daty lěpjaty dypk wubrać.

Jeli symbol relatiwny lěpjaty dypk je aktiwny, so lěpjaty dypk pohibuje, hdyž wulkosć objekta měnjeće, zo by so pozicija nastupajo objektowe ramiki zachowała.

Jeli symbol Relatiwny lěpjaty dypk aktiwny njeje, symbole pódla njeho hižo šěre njejsu. Z tutymi symbolemi móžeće rozsudźić, hdźež so ma lěpjaty dypk placěrować, hdyž so wulkosć objekta měnja.