Powšitkowne
We wotrězku Powšitkowne móžeće standardne nastajenja za składowanje dokumentow a standardne datajowe formaty wubrać.
Někotre nastajenja njedadźa so wróćo stajić, hdyž su so wobdźěłali. Stajće pak změny manuelnje wróćo pak klikńće na Přetorhnyć a wočińće zaso dialog Nastajenja.
Začitać
Swójske nastajenja z dokumentom začitać
Začita swójske nastajenja wužiwarja, kotrež su w dokumenće składowane, z dokumentom.
Jeli nastajenje Swójske nastajenja z dokumentom začitać wubrane njeje, slědowace swójske nastajenja hišće płaća:
-
Nastajenja, kotrež su w Dataja – Ćišćeć… – Nastajenja k dispoziciji,
-
Mjeno faksoweho nastroja,
-
Nastajenja wotstupow za wotstawki před tekstowymi tabelemi,
-
Informacije wo awtomatiskej aktualizaciji za zwjazanja, pólne funkcije a diagramy,
-
Informacije wo dźěle z aziskimi znamješkowymi formatami.
Slědowace nastajenja so přeco z dokument začitaja, hač tute nastajenje je zmóžnjene abo nic:
-
Datowe žórło zwjazane z dokumentom a jeho napohlad.
Ćišćerske nastajenja z dokumentom začitać
Jeli tute nastajenje je zmóžnjene, so ćišćerske nastajenja z dokumentom začitaja. To móže zawinować, zo so dokument na zdalenym ćišćaku ćišći, jeli ćišćak w dialogu Ćišćeć manuelnje njeměnjeće. Jeli tute nastajenje je znjemóžnjene, so standardny ćišćak wužiwa, zo by tutón dokument ćišćał. Aktualne ćišćerske nastajenja so z dokumentom składuja, hač tute nastajenje je zmóžnjene abo nic.
Poziciju napohlada z dokumentom začitać, samo hdyž je so wot druheho wužiwarja składował
Začita nastajenja napohladneje pozicije, kotrež su w dokumenće składowane, z dokumentom, samo hdyž je so wot druheho wužiwarja składował.
Jeli nastajenje Poziciju napohlada z dokumentom začitać, samo hdyž je so wot druheho wužiwarja składował wubrane njeje, so pozicija napohlada jenož z dokumentom začita, jeli metadaty awtora w dokumenće prědmjenu a swójbnemu mjenu w – LibreOffice – Wužiwarske daty wotpowěduja. Dźiwajće na to, zo awtor so jenož z dokumentom składuje, jeli nastajenje Wužiwarske daty nałožić w je zmóžnjene.
Składować
Informacije awtomatiskeho wobnowjenja składować kóžde
Podawa, zo LibreOffice informacije składuje, kotrež su w padźe spada trěbne, zo bychu so wšě změnjene dokumenty wobnowili.
Mjeńšiny
Podawa časowy interwal w mjeńšinach, prjedy hač so informacije awtomatiskeho wobnowjenja za dokument składuja.
Časoměr so za dokument startuje, hdyž so dokument prěni raz měnja. Informacije awtomatiskeho wobnowjenja so po podatym času składuja (mjeztym zo LibreOffice je w prózdnoběhu). Časoměr so potom z přichodnej změnu w dokumenće znowa startuje.
Město toho dokument awtomatisce składować
Podawa, zo LibreOffice změnjeny dokument sam składuje, město toho zo by nachwilnu wobnowjensku wersiju wutworił. Wužiwa časowy interwal podaty w .
Dokumentowe kajkosće před składowanjom wobdźěłać
Podawa, zo so dialog Kajkosće kóždy raz jewi, hdyž přikaz Składować jako wuběraće.
Přeco zawěsćensku kopiju wutworić
Składuje předchadnu wersiju dokumenta jako zawěsćensku kopiju, hdyžkuli dokument składujeće. Kóždy raz, hdyž LibreOffice zawěsćensku kopiju wutworja, so předchadna zawěsćenska kopija wuměnja. Zawěsćenska kopija datajowu kóncowku .BAK dóstawa.
Zo byšće městno zawěsćenskeje kopije změnił, wubjerće – LibreOffice – Šćežki a zapodajće potom nowu šćežku za zawěsćensku dataju.
Zawěsćenje do samsneho rjadowaka kaž dokument składować
Zawěsćenska kopija so do samsneho rjadowaka kaž dokument składuje. Jeli zawěsćenska kopija njeda so z někajkeje přičiny w samsnym rjadowaku składować, pospytuje LibreOffice kopiju w rjadowaku w składować.
URL relatiwnje k datajowemu systemej składować
Tute nastajenje wam zmóžnja, standard za relatiwne adresowanje URL w datajowym systemje a w interneće postajić. Relatiwne adresowanje je jenož móžne, jeli žórłowy dokument a cilowy dokument stej na samsnym wothrawaku.
Relatiwna adresa so přeco ze zapisom započina, w kotrymž je aktualny dokument. Porno tomu so absolutna adresa přeco w korjenjowym zapisu započina. Slědowaca tabela rozdźěl w syntaksy mjez relatiwnym a absolutnym adresowanjom pokazuje:
|
Přikłady |
Datajowy system |
Internet |
|---|---|---|
|
relatiwny |
../images/img.jpg |
../images/img.jpg |
|
absolutny |
file:///C:/dźěło/wobrazy/img.jpg |
https://myserver.com/work/images/img.jpg |
Pokiw pomocy přeco absolutnu šćežku pokazuje. Jeli pak so dokument w HTML-formaće składuje, LibreOffice relatiwnu šćežku zapoda, jeli wotpowědny kontrolny kašćik je wubrany.
Wubjerće tutón kontrolny kašćik za relatiwne składowanje URL w datajowym systemje.
URL relatiwnje k internetej składować
Wubjerće tutón kontrolny kašćik za relatiwne składowanje URL w interneće.
Nastajenja za standardny datajowy format a ODF
Wersija ODF-formata
LibreOffice 7.0 format OpenDocument (ODF) wersije 1.3. podpěruje. Předchadne wersije LibreOffice datajowy format ODF 1.2 podpěruja. Starše datajowe formaty njemóža wšě nowe funkcije noweje softwary składować.
OpenOffice.org 3 a StarOffice 9 stej nowe funkcije zawjedłoj, kotrež dyrbja so z pomocu formata OpenDocument (ODF) wersije 1.2 składować. Staršej wersiji OpenOffice.org 2 a StarOffice 8 datajowej formataj ODF 1.0/1.1 podpěrujetej. Tej staršej datajowej formataj njemóžetej wšě nowe funkcije noweje softwary składować.
Aktualne wersije LibreOffice móža dokumenty w formatach ODF 1.0/1.1, 1.2 a 1.3 wočinić.
Hdyž dokument składujeće, móžeće wubrać, hač so ma dokument w formaće ODF 1.3, ODF 1.3 Extended, ODF 1.2, ODF 1.2 Extended, ODF 1.2 Extended (modus kompatibelnosće) abo w staršim formaće ODF 1.0/1.1 składować.
Tuchwilu formataj ODF 1.2 (Extended) abo nowše zmóžnjeja, zo dataje Draw a Impress komentary wobsahuja. Tute komentary dadźa so přez do najnowšeje wersije softwary zasadźić. Komentary so zhubja, hdyž so dataje do staršich wersijow softwary začituja, kotrež su so z najnowšej wersiju softwary składowali.
Někotre předewzaća abo organizacije snano ODF-dokumenty we formaće ODF 1.0/1.1 abo ODF 1.2 trjebaja. Móžeće tute formaty wubrać, zo byšće je w lisćinowym polu składował. Tute starše formaty njemóža wšě nowe funkcije składować, tohodla so nowy format ODF 1.3 (rozšěrjeny) poručuje, hdźež to je móžne.
ODF 1.2 Extended (modus kompatibelnosće) je dele kompatibelny modus ODF 1.2 Extended. Wužiwa funkcije, kotrež su w ODF 1.2 zestarjene a/abo ze staršimi wersijemi OpenOffice.org po zmylkach kompatibelne. Móže wužitnje być, jeli dyrbiće ODF-dokumenty z wužiwarjemi wuměnić, kotřiž zestarjene nałoženja před ODF 1.2 abo jenož ODF 1.2 wužiwaja.
Dokumentowy typ
Podawa dokumentowy typ, za kotryž chceće standardny datajowy format definować.
Přeco składować jako
Podawa, kak dokumenty nalěwo wubraneho typa so přeco jako tutón datajowy typ składuja. Móžeće druhi datajowy typ za aktualny dokument w dialogu Składować jako wubrać.
Přeco warnować, hdyž so w ODF-formaće abo standardnym formaće njeskładuje
Móžeće postajić, zo so warnowanska zdźělenka pokazuje, hdyž dokument we formaće składujeće, kotryž OpenDocument njeje, abo kotryž njejsće w nastajenjach pod Začitać/Składować - Powšitkowne jako standardny format nastajił.
Móžeće postajić, kotry datajowy format ma so wužiwać, hdyž so dokumenty rozdźělnych dokumentowych typow składuja. Jeli přeco swoje dokumenty z druhimi wosobami wuměnjeće, kotřiž na přikład Microsoft Office wužiwaja, móžeće tu podać, zo LibreOffice jenož datajowe formaty Microsoft Office jako standard wužiwa.