Dokumenty z OpenPGP zaklučować

LibreOffice móže dokumenty z pomocu kryptografiju zjawneho kluča OpenPGP zaklučować. Dokument so z algoritmusom symetriskeho zaklučowanja zaklučuje.

Signowanje z GPG jenož za dokumenty ODF funguje.

Přistup k tutomu přikazej …

Wubjerće meni Dataja – Składować jako… a potom Z klučom GPG zaklučować a klikńće na Składować.

LibreOffice móže dokumenty z pomocu OpenPGP dowěrliwje zaklučować. Dokument so ze symetriskim zaklučowanskim algoritmusom zaklučuje, kotryž sej symetriski kluč wužaduje. Kóždy symetriski kluč so jenož jedyn raz wužiwa a rěka tež posedźenski kluč. Dokument a jeho posedźenski kluč so přijimarjej sćeletej. Posedźenski kluč dyrbi so přijimarjam słać, zo bychu wědźeli, kak móža dokument rozklučować, ale, zo by jón za přenošowanje škitał, zaklučuje so ze zjawnym klučom přijimarja. Jenož priwatny kluč přijimarja móže posedźenski kluč rozklučować.

LibreOffice software OpenPGP wužiwa, kotraž je na wašim ličaku instalowana. Jeli software OpenPGP k dispoziciji njeje, dyrbiće přihódnu za swój dźěłowy system sćahnyć, najskerje z wobchoda nałoženjow abo rozdźělenskeho kanala za software.

Tu su někotre eksterne GPG-nałoženja, wo kotrychž je znate, zo z LibreOffice funguja:

gpg4win na Windows
GPG Suite na macOS
Na Linux su zwjetša hižo instalowane:

gnupg – nastroj přikazoweje linki za signowanje, zaklučowanje a rjadowanje klučow.

Grafiske nałoženja za gnupg kaž na přikład Seahorse (gnome), Kleopatra a KGpg (KDE).

gpgme – nałoženska programowa tykačka (API) za wuwiwanje nałoženjow z GPG.

Dyrbiće wosobinski por kryptografiskich klučow z nałoženjom OpenPGP definować. Slědujće instrukcijam instalowaneje software OpenPGP, zo byšće por klučow wutworił, je zwjetša prěni krok, kotryž dyrbiće po instalaciji software wuwjesć.

Konfiguracija zaklučowanja LibreOffice

Postajće preferowany zjawny kluč za zaklučowanje OpenPGP a digitalnu signaturu. Tute preferowane kluče so kóždy raz, hdyž dokument signujeće abo zaklučujeće, we wuběranskim dialogu awtomatisce wuběraja, zo njebyšće trjebał je wubrać, hdyž z wěstym klučom husto signujeće.

Wubjerće meni – Wužiwarske daty. We wobłuku Kryptografija:

Podpisowy kluč OpenPGP

Wubjerće swój kluč OpenPGP z wuběranskeje lisćiny, zo byšće ODF-dokumenty signował.

Kluč OpenPGP za zaklučowanje

Wubjerće swój kluč OpenPGP z wuběranskeje lisćiny, zo byšće ODF-dokumenty zaklučował.

Hdyž so dokumenty zaklučuja, přeco ze swójskim klučom

Markěrujće tutón kontrolny kašćik, zo byšće dataju tež ze swojim klučom zaklučował, zo byšće móhł dokument ze swojim priwatnym klučom wočinił.

Wostajće tute nastajenje wubrane, jeli chceće dokumenty dešifrować, kotrež sće za druhe wosoby zaklučował.

Dokumenty zaklučować

Zaklučowanje OpenPGP sej wužiwanje zjawneho kluča přijimarja wužaduje a tutón kluč dyrbi w klučowym rjećazu OpePGP k dispozici być, kotryž je na wašim ličaku składowany. Zo byšće dokument zaklučował:

Wubjerće Dataja – Składować jako….
Zapodajće mjeno za dataju.
Markěrujće kontrolny kašćik Z GPG-klučom zaklučować.
Klikńće na Składować. LibreOffice dialog za wuběranje zjawneho kluča OpenPGP wočinja.
Wubjerće zjawny kluč přijimarja. Móžeće wjacore kluče naraz wubrać.
Klikńće na W porjadku, zo byšće dialog začinił a dataju składował.

Dataja so z wubranymi zjawnymi klučemi zaklučowana składuje.

Jenož priwatny kluč přijimarja móže dokument rozklučować, chibazo zaklučujeće tež sam.

Dokumenty rozklučować

Móžeće jenož dokumenty rozklučować, kotrež su z wašim zjawnym klučom zaklučowane. Zo byšće dokument rozklučował:

Wočińće dokument. Namołwa za zapodaće hesła so zjewi.
Zapodajće hesło priwatneho kluča OpenPGP. Dokument so rozklučuje a wobsah je k dispoziciji.

Rozdźěl mjez dokumentowym zaklučowanjom z OpenPGP a składowanjom z hesłom

Wobaj přikazaj zaběratej so z dowěrliwosću, ale na rozdźělne wašnje.

Jeli dokument z hesłom składujeće, dyrbiće sej hesło spomjatkować, kotrež sće zapodał, zo byšće dokument pozdźišo wočinił. Kóždy druhi, kotryž dyrbi dokument wočinić, dyrbi tež hesło wědźeć, kotrež je so za składowanje wužiło. Tohodla dyrbi so składowanske hesło přenošować, zo bychu jo druzy wužiwarjo wědźeli.

Dataje, kotrež su so ze składowanskim hesłom zaklučowali, njedadźa so rozklučować, chibazo składowanske hesło so zapodawa.

Ze zaklučowanjom OpenPGP za dokumenty definujeće skupinu wužiwarjow, kotřiž móža dokument rozklučować a njetrjebaće hesła po kanalach słać, kotrychž wěstota znata njeje. Nimo toho nałoženje OpenPGP klučowy rjećaz zjawnych klučow eficientnišo rjaduje.

Wo digitalnych signaturach

OpenPGP we Wikipediji (němsce)