Wo digitalnych signaturach
W LibreOffice móžeće swoje dokumenty a makra digitalnje signować.
Certifikaty
Zo byšće dokument digitalnje signował, trjebaće wosobinski kluč, certifikat. Wosobinski kluč so na wašim ličaku jako kombinacija priwatneho kluča składuje, kotryž dyrbi so zatajić, a zjawny kluč, kotryž swojim dokumentam přidawaće, hdyž je signujeće.
Dokument składować a signować
Hdyž digitalnu signaturu na dokument nałožujeće, so typ kontrolneho suma z wobsaha dokumenta a wašeho wosobinskeho kluča wobliči. Kontrolna suma a waš zjawny kluč so hromadźe z dokumentom składujetej.
Signowany dokument wočinić
Hdyž něchtó dokumenta na někajkim ličaku z najnowšej wersiju LibreOffice wočinja, program kontrolnu sumu znowa wobliča a ju ze składowanej kontrolnej sumu přirunuje. Jeli wobě stej jenakej, program signalizuje, zo originalny, njezměnjeny dokument widźiće. Nimo toho móže program wam informacije wo zjawnym kluču z certifikata pokazać.
Móžeće zjawny kluč ze zjawnym klučom přirunać, kotryž je na websydle certifikowanskeho městna wozjewjeny.
Hdyžkuli něchtó něšto w dokumenće měnja, tuta změna digitalnu signaturu rani. Po změnje so pokazany dokument hižo jako originalny dokument njewoznamjenja.
Wuslědk přepruwowanja signatury so w statusowej lajsće a w dialogu Digitalna signatura pokaza. Wjacore dokumenty a makrowe signatury móža w dokumenće ODF wobsahowane być. Jeli je problem z jednej signaturu, potom so připušća, zo wuslědk přepruwowanja tuteje jedneje signatury za wšě signatury płaći. To rěka, jeli je dźesać płaćiwycch signaturow a jedna njepłaćiwa signatura, potom statusowa lajsta a statusowe polo w dialogu signaturu jako njepłaćiwa woznamjenjatej.
Móžeće jedyn ze slědowacych symbolow a powěsćow widźeć, hdyž signowany dokument wočinjeće.
|
Symbol w statusowej lajsće |
Status signatury |
|---|---|
|
|
Signatura je płaćiwa. |
|
|
Signatura je w porjadku, ale certifikaty njedachu so přepruwować. Signatura a certifikat stej w porjadku, ale nic wšě dźěle dokumenta su signowane. (Za dokument, kotrež su so ze starymi wersijemi softwary signowali, hlejće pokaz deleka.) |
|
|
Signatura je njepłaćiwa. |
Signatury a wersije softwary
Signowanje wobsaha je so z OpenOffice.org 3.2 a StarOffice 9.2 změniło. Nětko so wšě wobsahi datajow, nimo dataje signatury sameje (META-INF(documentsignatures.xml), signuja.
Hdyž dokument z OpenOffice.org 3.2 abo StarOffice 9.2 abo z pozdźišej wersiju signujeće, a tón dokument w staršej wersiji softwary wočinjeće, so signatura jako „njepłaćiwa“ pokazuje. Signatury, kotrež su so ze staršimi wersijemi softwary wutworili, so z tekstom „jenož dźěle dokumenta su signowane“ markěruja, hdyž so do nowšeje softwary začitaja.
Hdyž dokument OOXML signujeće, so signatura potom přeco z tekstom „jenož dźěle dokumenta su signowane“ markěruja. Metadaty datajow OOXML so ženje njesignuja, zo bychu kompatibelne z Microsoft Office byli.
Hdyž dokument PDF signujeće, so tute markěrowanje njewužiwa. Hdyž jenož dźěle dokumenta signujeće, njepłaćiwa signatura nastawa.
Signowanje druhich dokumentowych formatow so tuchwilu njepodpěruje.
Hdyž dokument ODF začitujeće, widźiće snano symbol w statusowej lajsće a statusowe polo w dialogu, kotrež podawa, zo dokument je jenož zdźěla signowany. Tutón status so zjewi, hdyž signatura a certifikat stej płaćiwej, ale stej so ze staršej wersiju OpenOffice.org hač 3.2 abo ze staršej wersiju StarOffice hač 9.2 wutworiłoj. We wersijach OpenOffice.org a StarOffice, kotrež su starše hač wersija 3.0 resp. 9.0 so signatura dokumenta jenož na hłowny wobsah, wobrazy a zasadźene objekty nałožuje a někotry wobsah, kaž makra, njeběchu so signowali. W OpenOffice.org 3.0 a Staroffice 9.0 bě so signatura dokumenta na najwjace wobsaha nałožiła, tež makra. Typ MIME wšak a wobsah rjadowaka META-INF so njesignowaštej. A w OpenOffice.org 3.2, StarOffice 9.2 a we wšěch wersijach LibreOffice so wšón wobsah, nimo dataje signatury sameje (META-INF/documentsignatures.xml) signuje.
Wěstotne warnowanja
Hdyž signowany dokument dóstawaće, a software zdźěla, zo signatura je płaćiwa, to njerěka, zo móžeće absolutnje wěsty być, zo dokument je samsny, kotryž je wotpósłar pósłał. Signowane dokumenty z certifikatami softwary dočista wěsta metoda njeje. Je wjele móžnosćow, z kotrymiž da so wěstotnym funkcijam z puća hić.
Přikład: Předstajće sej někoho, kiž wudawa, zo je wotpósłar wašeje banki. Móže z falšnym mjenom lochko certifikat dóstać, wam signowanu mejlku słać, z twjerdźenjom, zo za wašu banku dźěła. Dóstanjeće mejlku a mejlka abo dokument w njej ma „płaćiwy signowany“ symbol.
Njedowěrće symbolej. Přepruwujće certifikaty.
Płaćiwosć signatury prawnisce wjazaca garantija njeje.
Na dźěłowych systemach Windows so funkcije Windows za přepruwowanje signatury wužiwaja. Na systemach Solaris a Linux so dataje wužiwaja, kotrež so přez Thunderbird, Mozilla abo Firefox k dispoziciji stajeja. Dyrbiće zawěsćić, zo dataje, kotrež so we wašim systemje wužiwaja, woprawdźe su dataje, kotrež prěnjotni wuwiwarjo k dispoziciji stajeja. Za złowólnych zadobywarjow je wjele móžnosćow, z kotrymiž móža originalne dataje ze swójskimi datajemi wuměnić.
Zdźělenki wo płaćiwosći signatury, kotrež w LibreOffice widźiće, su zdźělenki, kotrež přepruwowanske dataje wróćeja. Software LibreOffice móžnosć nima zawěsćić, zo zdźělenki woprawdźity status certifikata wotbłyšćuja. Software LibreOffice jenož zdźělenki pokazuje,kotrež druhe dataje zdźěleja, kotrež pod kontrolu LibreOffice njejsu. Njeje žadyn prawniski zawjazk LibreOffice, zo pokazane zdźělenki woprawdźity status digitalneje signatury wotbłyšćuja.