Zatwarjenu pomoc instalować

Instrukcije za instalowanje zatwarjeneje pomocy wot metody wotwisuje, kotraž so za instalowanje LibreOffice na wašim graće wužiwa. Wobkedźbujće dwě slědowacej wašni postupowanja:

Instalacija z oficielnymi binarnymi datajemi, kotrež wot strony LibreOffice sćahnyć dóstanjeće.
Instalacije z pomocu repozitorijow třećich poskićowarjow. To předewšěm dźěłowe systemy Linux přitrjechi, kotrež swójske pakety wudźeržuja.

Tutón nawod instrukcije za instalaciju zatwarjeneje pomocy za pakety wobsahuje, kotrež so přez Ubuntu a Fedora k dispoziciji stajeja. Jeli so waša instalaciska metoda tu njewobjednawa, stajće so z wudźeržowarjemi paketow do zwiska, kotrež su na wašim systemje instalowane.

Wot oficielneje strony sćehnjenja instalować

Instrukcije w tutym wotrězku su přihódne, hdyž je so LibreOffice z oficielnymi binarnymi datajemi instalował. Přewjedźće slědowace kroki, zo byšće instalacisku dataju za zatwarjenu pomoc offline dóstał:

Wopytajće stronu LibreOffice sćahnyć.
Zawěsćće, zo waš aktualny dźěłowy system je we wotrězku Wubjerće swój dźěłowy system wubrany.
Klikńće na wotkaz Pomoc za wužiwanje offline a składujće binarnu dataju na swojim graće.

Prjedy hač na wotkaz Pomoc za wužiwanje offline klikaće, zawěsćće, za požadana rěč je wubrana. Klikńće na trjebaće druhu rěč?, jeli sej druhu rěč žadaće.

Windows

Wočińće městno, do kotrehož je so binarna dataja .msi sćahnyła a wuwjedźće instalaciski program. Sćěhujće instrukcije instalaciskeho programa.

MacOS

Wočińće městno, do kotrehož je so binarna dataja .dmg sćahnyła a wuwjedźće instalaciski program. Hdyž so instalaciske wokno jewi, ćehńće a pušćće symbol LibreOffice na symbol Nałoženja.

Instalaciski program DEB

Instalaciski program .deb je za distribucije Linux na zakładźe Ubuntu mysleny a je jako skomprimowana dataja .tar.gz k dispoziciji.

Sćehńće dataju .tar.gzna waš grat a ekstrahujće ju. Dataja .deb je w rjadowaku z mjenom DEBS.

Wočińće nałoženje Terminal, wužiwajće přikaz cd, zo byšće k rjadowakej nawigěrował, hdźež je dataja .deb a wuwjedźće slědowacy přikaz:

$ sudo dpkg -i libobasis7.6-hsb-help_7.6.4.1-1_amd64.deb

Mjeno sćehnjeneje dataje wersijowe čisło wobsahuje, tohodla móže so woprawdźite datajowe mjeno wot přikłada horjeka rozeznawać.

Instalaciski program RPM

Instalaciski program .rpm je za distribucije Linux na zakładźe Red Hat mysleny a je jako skomprimowana dataja .tar.gz k dispoziciji.

Sćehńće dataju .tar.gz na swój grat a ekstrahujće ju. Dataja .rpm je w rjadowaku z mjenom RPMS.

Wočińće nałoženje Terminal, wužiwajće přikaz cd, zo byšće k rjadowakej nawigěrował, hdźež je dataja .rpm a wuwjedźće slědowacy přikaz:

$ sudo rpm -i libobasis7.6-hsb-help-7.6.4.1-1.x86_64.rpm

Startujće po instalaciji LibreOffice znowa, zo byšće zatwarjenu pomoc wužiwał.

Z repozitorijow třećich poskićowarjow instalować

Distribucije Linux zwjetša swójske pakety LibreOffice k dispoziciji stajeja, tohodla so instalaciska metoda zatwarjeneje pomocy po distribuciji rozeznawa.

Slěduja instalaciske instrukcije za pakety pomocy, kotrež Ubuntu a Feodora k dispoziciji stajatej.

Distribucije na zakładźe Ubuntu

Wočińće nałoženje Terminal a wuwjedźće slědowacy přikaz (w slědowacym přikładźe so zatwarjena pomoc „hsb“ instaluje):

$ sudo apt install libreoffice-help-hsb

Fedora

Wočińće nałoženje Terminal a wuwjedźće slědowacy přikaz (w slědowacym přikładźe so zatwarjena pomoc „hsb“ instaluje):

$ sudo dnf install libreoffice-langpack-hsb

Pakety Snap

Paket Snap LibreOffice so z předinstalowanej zatwarjenej pomocu w rozdźělnych rěčach k dispoziciji staja.

Pomoc LibreOffice