Datowu sadźbu pytać

W formularach abo tabelach datoweje banki móžeće datowe pola, lisćinowe pola a kontrolne kašćiki za wěstymi hódnotami přepytać.

Při přepytowanju tabele so datowe pola aktualneje tabele přepytuja. Při přepytowanju formulara, so datowe pola tabele přepytuje, kotraž je z formularom zwjazana.

Pytanska funkcija je tež za tabelowe wodźenske elementy k dispoziciji. Hdyž pytansku funkciju z tabeloweho wodźenskeho elementa wuwołujeće, móžeće kóždu špaltu tabeloweho wodźenskeho elementa přepytać, kotrež špaltam datoweje banki zwjazaneje tabele datoweje banki wotpowěduja.

Pytać za

Podawa typ pytanja.

Tekst:

Zapodajće pytanski wuraz do pola abo wubjerće jón z lisćiny. Tekst pod kursorom je hižo do kombinaciskeho pola Tekst kopěrowany. Dźiwajće na to, zo tabulatory (↹) a łamanja linkow njedadźa so předźěłać, hdyž so pytanje w formularje přewjedźe.

Waše pytanske wurazy so składuja, mjeztym zo tabela abo formularowy dokument stej wočinjenej. Jeli wjacore pytanja přewjedźeće a byšće rady pytanski wuraz wospjetował, móžeće do toho wužiwany pytanski wuraz z kombinaciskeho pola wubrać.

Pólny wobsah je NULL

Podawa, zo so pola pytaja, kotrež daty njewobsahuja.

Pólny wobsah NULL njeje

Podawa, zo so pola pytaja, kotrež daty wobsahuja.

Městno pytanja

Podawa pola, kotrež so maja přepytać.

Formular

Podawa logiski formular, w kotrymž so ma pytanje wotměć.

Formularowe dokumenty móža wjacore logiske formulary wobsahować. Su jednotliwe formularowe komponenty, z kotrychž kóžda je z tabelu zwjazana.

Kombinaciske polo Formular mjena wšěch logiskich formularow wobsahuje, za kotrež wodźenske elementy eksistuja.

Wšě pola

Přepytuje wšě pola. Jeli pytanje w tabeli přewjedźeće, so wšě pola w tabeli přepytuja. Jeli pytanje we formularje přewjedźeće, so wšě pola logiskeho formulara, kotryž je pod Formular zapodaty, přepytuja. Jeli pytanje w polu tabeloweho wodźenskeho elementa přewjedźeće, so wšě špalty přepytuja, kotrež su z płaćiwym tabelowym polom datoweje banki zwjazane.

Dźiwajće na to, zo pola aktualneho logiskeho formulara njetrjebaja z polemi formularoweho dokumenta identiske być. Jeli formularowy dokument pola wobsahuje, kotrež na wjacore datowe žórła pokazuja (t. r. na wjacore logiske formulary), so nastajenje Wšě pola jenož pola přepytuje, kotrež su z datowymi žórłami we formularowym dokumenće zwjazane.

Jednotliwe polo

Přepytuje podate datowe polo.

Nastajenja

Definuje nastajenja za pytanje.

Pozicija

Podawa poćah mjez pytanskim wurazom a pólnym wobsahom. Slědowace nastajenja su k dispoziciji:

Position	Description
něhdźe w polu	Wróći wšě pola, kotrež pytanski muster něhdźe w polu wobsahuja.
spočatk pola	Wróći wšě pola, kotrež pytanski muster na spočatku pola wobsahuja.
kónc pola	Wróći wšě pola, kotrež pytanski muster na kóncu pola wobsahuja.
cyłe polo	Wróći wšě pola, kotrež pytanski muster jako eksaktny wotpowědnik pólneho wobsaha wobsahuja.

Pólny format nałožić

Podawa, zo so wšě pólne formaty wobkedźbuja, hdyž so w aktualnym dokumenće pyta. Pólne formaty su wšě widźomne formaty, kotrež so ze slědowacymi móžnosćemi wutworjeja:

1. w modusu tabeloweho naćiska za pólne kajkosće,

2. w napohledźe datoweho žórła za špaltowe formatěrowanje,

3. w formularje za kajkosće wodźenskeho elementa.

Jeli polo Pólny format nałožić je markěrowane, so napohlad datoweho žórła tabele abo formulara z pomocu tam nastajeneho formatěrowanja přepytuje. Jeli polo markěrowane njeje, so datowa banka z pomocu formatěrowanja přepytuje, kotrež je w datowej bance składowane.

Přikład:

Maće datumowe polo, kotrež je we formaće „DD.MM.LL w datowej bance (na přikład 17.02.65) składowane. Format zapiska so w napohledźe datowych žórłow do „DD. MMM LLLL“ (17. feb 1965) měnja. Po tutym přikładźe so datowa sadźba, kotraž 17. februara wobsahuje, jenož namaka, hdyž nastajenje Pólny format nałožić je zmóžnjene:

Pólny format nałožić	Pytanski muster
zapinjeny	„Feb“ so namaka, ale nic „2“.
wupinjeny	„2“ so namaka, ale nic „feb“.

Poruča so, zo přeco z pólnym formatěrowanjom pytaće.

Slědowace přikłady móžne problemy pokazuja, hdyž bjez pólneho formatěrowanja pytaće. Tute problemy wot datoweje banki wotwisuja, kotraž so wužiwa a wustupuja jenož za wěste nutřkowne standardne formatěrowanje:

Pytanske wuslědki	Wina
„5“ „14:00:00“ jako čas namaka.	Časowe pola so za datowe banki dBASE definuja a dyrbja so simulować. Zo byšće čas „14:00:00“ internje pokazał, je „5“ trěbny.
„00:00:00“ wšě datowe sadźby standardneho datumoweho pola namaka.	Datowa banka datumowu hódnotu z pomocu skombinowaneho datumoweho/časoweho pola internje składuje.
„45,79“ „45,79“ njenamaka, hačrunjež nastajenje cyłe polo je pod Pozicija wubrane.	Pokazany napohlad tomu njewotpowěduje, štož so internje składuje. Jeli so na přikład „45,789 w datowej bance jako pólny typ „Ličba/Double“ składuje a pokazane formatěrowanje je tak nastajene, zo so dwě decimalnej městnje pokazujetej, so „45,79 jenož w pytanjach z pólnym formatěrowanjom namaka.

W tutym padźe je formatěrowanje formatěrowanje, kotrež so na internje składowane daty poćahuje. Je nic přeco za wužiwarja widźomne, předewšěm, jeli so za simulaciju datowych typow (na přikład časowe pola w datowych bankach dBASE) wužiwa. To wot datoweje banki wotwisuje, kotraž so wužiwa, a wot jednotliweho datoweho typa. Pytanje z pólnym formatěrowanjom so poskića, jeli jenož chceće namakać, štož so woprawdźe pokazuje. To pola typow Datum, Čas, Datum/Čas a Ličba/Double nastupa.

Pytanje bjez Pólny format nałožić wšak so za wjetše datowe banki bjez formatěrowanskich problemow poskića, dokelž pytanje je spěšniše.

Jeli hódnoty kontrolnych kašćikow pytaće a nastajenje Pólny format nałožić je zmóžnjene, dóstanjeće „1“ za markěrowane kontrolne kašćiki a „0“ za njemarkěrowane kontrolne kašćiki, a prózdny znamješkowy rjećazk za njedefinowane kontrolne kašćiki (z třomi stawami). Jeli pytanje ze znjemóžnjenym nastajenjom Pólny format nałožić přewjedźe, budźeće wot rěče wotwisnej standardnej hódnoće „WĚRNO“ abo „WOPAK“ widźeć.

Jeli nastajenje Pólny format nałožić wužiwaće, hdyž w lisćinowych polach pytaće, so tekst w lisćinowych polach pokazuje. Jeli nastajenje Pólny format nałožić njewužiwaće, namakaće wobsah po standardnym pólnym formaće.

Na wulkopisanje dźiwać

Podawa, hač so matej wulkopisanje a małopisanje za pytanje wobkedźbować.

Dozady pytać

Podawa, zo so pytanje w nawopačnym směrje wuwjedźe, wot poslednjeje do prěnjeje datoweje sadźby.

Wot spočatka/wot kónca

Startuje pytanje znowa. Pytanje doprědka z prěnjej datowej sadźbu startuje. Pytanje wróćo z poslednjej datowej sadźbu startuje.

Wuraz ze zastupowacymi symbolemi

Móžeće slědowace zastupowace symbole wužiwać:

Zastupowace symbole	Woznam	Přikład
?	za eksaktnje jedne někajkežkuli znamješko	„?loppy“ „Floppy“ namaka „Kowa?“ na přikład Kowar a Kowal namaka
*	Za 0 abo dalše někajkežkuli znamješka	„*-*“ „ZIP-Drive“ a „CD-ROM“ namaka „M*er“ wšě zapiski namaka, kotrež so z „M“ započinaja a na „er“ kónča (na přikład Müller, Möller, Meier)

Jeli chceće poprawne znamješka ? abo * pytać, započńće je z backslashom: „\?“ abo „\*“. To wšak je jenož trěbne, hdyž nastajenje Wuraz ze zastupowacymi symbolemi je zmóžnjene. Hdyž tute nastajenje zmóžnjene njeje, so zastupowace symbole kaž normalne znamješka předźěłuja.

Regularny wuraz

Pyta z regularnymi wurazami. Samsne regularne wurazy, kotrež so tu podpěruja, so tež w dialogu LibreOffice Pytać a wuměnić podpěruja.

Pytanje z regularnymi wurazami wjace móžnosćow hač pytanje ze zastupowacymi symbolemi skići. Jeli z regularnymi wurazami pytaće, slědowace znamješka tym wotpowěduja, kotrež so w pytanjach ze zastupowacymi symbolemi wužiwaja:

Ze zastupowacym wurazom pytać	Z regularnymi wurazami pytać
?	.
*	.*

Status

Statusowa linka datowe sadźby pokazuje, kotrež su so přez pytanje wróćili. Jeli pytanje kónc (abo spočatk) tabele docpěwa, so pytanje awtomatisce na druhim kóncu pokročuje.

Hdyž datowu sadźbu w nawopačnym směrje w jara wulkich datowych bankach pytaće, móže to dołho trać. W tym padźe statusowa lajsta wam zdźěla, zo so datowe sadźby hišće liča.

Pytać/Přetorhnyć

Jeli pytanje so wuspěšnje dokónča, so wotpowědne polo w tabeli wuzběhnje. Zo byšće z pytanjom pokročował, klikńće znowa na tłóčatko Pytać. Hdyž na tłóčatko Přetorhnyć klikaće, móžeće pytanski proces přetorhnyć.

Začinić

Začinja dialog. Nastajenja poslednjeho pytanja so składuja, doniž LibreOffice njekónčiće.

Jeli wjacore tabele abo formulary su wočinjene, móžeće rozdźělne pytanske nastajenja za kóždy dokument postajić. Hdyž dokumenty začinjeće, so jenož pytanske nastajenja dokumenta składuja, kotryž je so jako posledni začinił.