Daty

Rajtark Daty wam zmóžnja, wubranemu wodźenskemu elementej datowe žórło připokazać.

Móžne nastajenja rajtarka Daty wodźenskeho elementa wot dateho wodźenskeho elementa wotwisuje. Budźeće jenož nastajenja widźeć, kotrež su za aktualny wodźenski element a kontekst k dispoziciji.
Slědowace pola su k dispoziciji:

Datowe polo

We formularach datoweje banki móžeće wodźenske elementy z datowymi polemi zwjazać.

Maće wjacore móžnosće:

1. Prěni pad: Je jenož jedna tabela we formularje.

   Podajće pod Datowe polo polo tabele datoweho žórła, kotrehož wobsah chceće pokazać.

2. Druhi pad: Wodźenski element k podformularej słuša, kotryž je so přez SQL-wotprašowanje wutworił.

   Podajće pod Datowe polo polo SQL-instrukcije, kotrehož wobsah chceće pokazać.

1. Třeći pad: Kombinaciske pola

   Při kombinaciskich polach so polo tabele datoweho žórła, w kotrejž so maja wot wužiwarja zapodate abo wubrane hódnoty składować, pod Datowe polo podawa. Hódnoty, kotrež so w lisćinje kombinaciskeho pola pokazuja, na SQL-instrukciji bazuja, kotraž je pod Lisćinowy wobsah zapodata.

2. Štwórty pad: Lisćinowe pola

   Tabela datoweho žórła daty njewobsahuje, kotrež so maja pokazać, ale tabela, kotraž je z tabelu datoweho žórła přez zhromadne datowe polo zwjazana.

   Jeli chceće, zo lisćinowe polo daty z tabele pokazuje, kotrež su z aktualnej tabelu datoweho žórła zwjazane, podajće pod Datowe polo polo tabele datoweho žórła, na kotrež so wobsah lisćinoweho pola poćahuje. Abo móžeće polo datoweje banki podać, kotrež pokazanje datow we formularje wodźi. Tute datowe polo staja zwjazanje k druhej tabeli k dispoziciji, jeli wobě tabeli datej so přez zhromadne datowe polo zwjazać. Je zwjetša datowe polo, w kotrymž so jónkróćne identifikaciske čisła składuja. Datowe polo, kotrehož wobsah so we formularje pokazuje, so přez SQL-instrukciju pod Lisćinowy wobsah podawa.

Lisćinowe pola z referencami dźěłaja. Dadźa so pak ze zwjazanymi tabelemi přez SQL-instrukcije (štwórty pad) implementować pak přez lisćiny hódnotow:

Referency přez zwjazane tabele (SQL-instrukcije)

Jeli chceće, zo so daty z tabele datoweje banki w lisćinowym polu pokazuja, kotraž je přez zhromadne polo z tabelu zwjazana, na kotrejž formular bazuje, so zwjazowace polo formularoweje tabele pod Datowe polo podawa.

Zwjazanje so z SQL-přikazom Select wutwori, kotryž, jeli sće „SQL“ abo „Native SQL“ wubrał, so pod Typ lisćinoweho wobsaha w polu Lisćinowy wobsah podawa. Na přikład je tabela „Skazanki“ z aktualnym formularowym wodźenskim elementom zwjazana, a w datowej bance je tabela „Kupcy“ z tabelu „Skazanki“ zwjazana. Móžeće SQL-instrukciju kaž slěduje wužiwać:

SELECT MjenoKupca, ČisłoKupca FROM Kupcy,

při čimž „MjenoKupca“ je datowe polo ze zwjazaneje tabele „Kupcy“ a „ČisłoKupca“ je polo tabele „Kupcy“, kotrež je z polom formularoweje tabele „Skazanki“ podatym pod Datowe polo zwjazane.

Referency přez lisćiny hódnotow

Za lisćinowe pola móžeće lisćiny hódnotow wužiwać. Lisćiny hódnotow su lisćiny, kotrež referencne hódnoty definuja. Na tute wašnje wodźenski element we formularje wobsah pola datoweje banki direktnje njepokazuje, ale hódnoty, kotrež su w lisćinje hódnotow připokazane.

Jeli z referencnymi hódnotami lisćiny hódnotow dźěłaće, wobsah datoweho pola, kotrež sće pod Datowe polo w formularje podał, widźomny njeje, ale připokazane hódnoty. Jeli sće „Lisćina hódnotow“ w rajtarku Daty pod Typ lisćinoweho wobsaha wubrał a widźomnym lisćinowym zapiskam we formularje pod Lisćinowe zapiski (w rajtarku Powšitkowne) referencnu hódnotu připokazał, so referencne hódnoty z datowym wobsahom dateho datoweho pola přirunuja. Jeli referencna hódnota wobsahej datoweho pola wotpowěduje, so zwjazane lisćinowe zapiski we formularje pokazaja.

Filtrowy namjet

Hdyž swój formular naćiskujeće, móžeće kajkosć „Filtrowy namjet“ za kóžde tekstowe polo w rajtarku Daty wotpowědneho dialoga Kajkosće nastajić. W na so sćěhowacych pytanjach we filtrowym modusu móžeće ze wšěch informacijow wubrać, kotrež su w tutych polach wobsahowane. Pólny wobsah da so potom z pomocu funkcije Awtomatisce wupjelnić wubrać. Dźiwajće wšak na to, zo sej tuta funkcija wjace składa a časa wužaduje, předewšěm, hdyž so we wulkich datowych bankach wužiwa a měła so tohodla zrědka wužiwać.

Lisćinowy wobsah

Podawa datowe žórło za lisćinowy wobsah formularoweho elementa z formularami datoweje banki. Tute polo da so wužiwać, zo by lisćinu hódnotow za dokumenty bjez zwiska datoweje banki definowało.

W padźe formularow datoweje banki datowe žórło zapiski lisćinoweho abo kombinaciskeho pola postaja. Wotwisujo wot wubraneho typa, maće wólbu mjez rozdźělnymi datowymi žórłami pod Lisćinowy wobsah, pod wuměnjenjom, zo tute objekty we wašej datowej bance eksistuja. Wšě k dispoziciji stejace objekty datoweje banki typa, kotryž je pod Typ lisćinoweho wobsaha wubrany, so tu poskićeja. Jeli sće nastajenje „Lisćina hódnotow“ jako typ wubrał, móžeće referency za formulary datoweje banki wužiwać. Jeli pokazanje wodźenskeho elementa so přez SQL-přikaz wodźi, so SQL-instrukcija tu zapodawa.

Přikłady za SQL-instrukcije:

Za lisćinowe pola móže SQL-instrukcija slědowacu formu měć:

SELECT polo1, polo2 FROM tabela,

Tu je „tabela“ tabela, kotrejež daty so w lisćinje wodźenskeho elementa (lisćinowa tabela) pokazuja. „polo1“ je datowe polo, kotrež widźomne zapiski we formularje definuje; jeho wobsah so w lisćinowym polu pokazuje. „polo2“ je polo lisćinoweje tabele, kotraž je z formularowej tabelu (tabela hódnotow) přez polo zwjazane, kotrež je pod Datowe polo podate, jeli je so Wjazane polo = 1 wubrało.

Za kombinaciske pola móže SQL-instrukcija slědowacu formu měć:

SELECT DISTINCT polo FROM tabela,

„polo“ je tu datowe polo z lisćinoweje tabele „tabela“, kotrejež wobsah so w lisćinowym abo kombinaciskim polu pokazuje.

Lisćiny hódnotow za HTML-dokumenty

Za HTML-formulary móžeće pod Lisćinowy wobsah lisćinu hódnotow zapodać. Wubjerće nastajenje „Lisćina hódnotow“ pod Typ lisćinoweho wobsaha. Zapodate hódnoty tu we formularje widźomne njebudu, a so wužiwaja, zo bychu widźomnym zapiskam hódnoty připokazali. Zapiski, kotrež su pod Lisćinowy wobsah podate, značce HTML <OPTION VALUE=…> wotpowěduja.

Při přenošowanju datow wubraneho zapiska z lisćinoweho abo kombinaciskeho pola so lisćina hódnotow, kotraž so we formularje pokazuje, kotraž je so w rajtarku Powšitkowne pod Lisćinowe zapiski zapodała kaž tež lisćina hódnotow, kotraž je so na rajtarku Daty pod Lisćinowy wobsah zapodała, wobkedźbujetej: Jeli (njeprózdny) tekst je na wubranej poziciji w lisćinje hódnotow (<OPTION VALUE=…>), so tutón přenošuje. Hewak so tekst sćele, kotryž so we wodźenskim elemenće (<OPTION>) pokazuje.

Jeli lisćina hódnotow ma prózdny znamješkowy rjećazk wobsahować, zapodajće hódnotu „$$$empty$$$“ pod Lisćinowy wobsah na wotpowědnej poziciji (dźiwajće na wulkopisanje a małopisanje). LibreOffice tute zapodaće jako prózdny znamješkowy rjećazk interpretuje a připokazuje jo wotpowědnemu lisćinowemu zapiskej.

Slědowaca tabela zwiski mjez HTML, JavaScript a polom LibreOffice Lisćinowy wobsah přez přikładowe lisćinowe polo z mjenom „ListBox1“ pokazuje. W tutym padźe „Item“ lisćinowy zapisk woznamjenja, kotryž je we formularje widźomny:

Značka HTML	JavaScript	Zapisk w lisćinje hódnotow wodźenskeho elementa (lisćinowy wobsah)	Přenjesene daty
<OPTION>Item	Njemóžny	""	widźomny lisćinowy zapisk („ListBox1=Item“).
<OPTION VALUE="Hódnota">Item	ListBox1.options[0].value="Hódnota"	„Hódnota“	Hódnota, kotraž je lisćinowemu zapiskej připokazana („ListBox1=Hódnota“).
<OPTION VALUE="">Item	ListBox1.options[0].value=""	"$$$empty$$$"	Prózdny znamješkowy rjećazk („ListBox1=“)

Prózdny znamješkowy rjećazk je NULL

Definuje, kak so z prózdnym znamješkowym rjećazkom wobchadźa. Jeli je na „Haj“ stajene, wobchadźa so ze zapodawanskim znamješkowym rjećazkom z dołhosću 0 kaž z hódnotu NULL. Jeli je na „Ně“ stajene, wobchadźa so z kóždym zapodaćom kaž je, bjez přetworjenja.

Prózdny znamješkowy rjećazk je znamješkowy rjećazk z dołhosću nul (""). W normalnym padźe hódnota NULL samsne kaž prózdny znamješkowy rjećazk njeje. Powšitkownje so zapřijeće NULL wužiwa, zo by njedefinowanu hódnotu woznamjeniło, njeznatu hódnotu abo zo „hišće žana hódnota zapodata njeje“.

Systemy datoweje banki wariěruja a móža z hódnotu NULL rozdźělnje wobchadźeć. Čitajće dokumentacije datoweje banki, kotruž wužiwaće.

Referencna hódnota (wupinjeny)

Kontrolne kašćiki a opciske tłóčatka w tabelowych dokumentach dadźa so z celemi w aktualnym dokumenće zwjazać. Jeli wodźenski element je zmóžnjeny, so hódnota, kotruž w Referencna hódnota (zapinjeny) zapodawaće, do cele kopěruje. Jeli wodźenski element je znjemóžnjeny, so hódnota z Referencna hódnota (wupinjeny) do cele kopěruje.

Referencna hódnota (zapinjeny)

Móžeće referencnu hódnotu opciskim tłóčatkam a kontrolnym kašćikam připokazać. Referencna hódnota so na serwer sćele, hdyž webformular wotesyłaće. We formularach datoweje banki so zapodata hódnota tu do datoweje banki pisa, kotraž je wodźenskemu elementej připokazana.

Referencne hódnoty za webformulary

Referencne hódnoty su wužitne, jeli webformular naćisnjeće a informacije wo statusu wodźenskeho elementa so na serwer přenošuja. Jeli wužiwar na wodźenski element klika, so wotpowědna referencna hódnota na serwer sćele.

Jeli na přikład dwaj wodźenskej elementaj za nastajeni „žónski“ a „muski“ maće a polu „žónski“ referencnu hódnotu 1 a polu „muski“ referencnu 2 připokazujeće, so hódnota 1 na serwer přenošuje, jeli wužiwar na polo „žónski“ klika a hódnota 2 so sćele, jeli wužiwar na polo „muski“ klika.

Referencne hódnoty za formulary datoweje banki

Při formularach datoweje banki móžeće tež status opciskeho tłóčatka abo kontrolneho kašćika po referencnej hódnoće woznamjenić, hdyž ju w datowej bance składujeće. Jeli maće tři nastajenja, na přikład „běži“ „sčinjeny“ a „zasopředpołoženje“ z datymi referencnymi hódnotami „ToDo“, „OK“ a „ZP“ so tute referencne hódnoty w datowej bance jewja, jeli na date nastajenje klikaće.

Typ lisćinoweho wobsaha

Postaja daty, z kotrymiž so maja lisćiny w lisćinowych a kombinaciskich polach pjelnić.

Z nastajenjom „Lisćina hódnotow“ so wšě zapiski, kotrež su w polu Lisćinowe zapiski rajtarka Powšitkowne zapodate, we wodźenskim elemenće jewja. Za formulary datoweje banki móžeće referencne hódnoty wužiwać (hlejće wotrězk Referency přez lisćiny hódnotow).

Jeli so wobsah wodźenskeho elementa z datoweje banki čita, móžeće typ datoweho žórła přez druhe nastajenja postajić. Móžeće na přikład mjez tabelemi a wotprašowanjemi wubrać.

Wjazane polo

Tuta kajkosć za lisćinowe pola definuje, kotre datowe polo zwjazaneje tabele so we formularje pokazuje.

Jeli lisćinowe polo we formularje ma wobsah tabele pokazać, kotraž je z formularowej tabelu zwjazana, definujće w polu Typ lisćinoweho wobsaha, hač so pokazanje přez SQL-přikaz postaja abo přez přistup k (zwjazanej) tabeli. Z kajkosću Wjazane polo indeks wužiwaće, zo byšće podał, z kotrym datowym polom wotprašowanja abo tabele so lisćinowe polo zwjazuje.

Jeli sće „SQL“ pod Typ lisćinoweho pola wubrał, SQL-přikaz indeks postaja, kotryž so ma podać. Přikład: Jeli SQL-přikaz podawaće, kaž na přikład „SELECT Polo1, Polo2 FROM Tabelowe_mjeno“ pod Lisćinowy wobsah, poćahujće so na slědowacu tabelu:

Wjazane polo	Zwjazanje
-1	Indeks wubraneho zapiska w lisćinje je z polom zwjazany, kotrež je pod Datowe polo podate.
{prózdny} abo 0	Polo „Polo1“ datoweje banki je z polom zwjazane, kotrež je pod Datowe polo podate.
1	Polo „Polo2“ datoweje banki je z polom zwjazane, kotrež je pod Datowe polo podate.

Jeli sće „Tabela“ pod Typ lisćinoweho wobsaha wubrał, tabelowa struktura indeks definuje, kotryž so ma podać. Přikład: Jeli tabela datoweje banki je pod Lisćinowy wobsah wubrana, poćahujće so na slědowacu tabelu:

Wjazane polo	Zwjazanje
-1	Indeks wubraneho zapiska w lisćinje je z polom zwjazany, kotrež je pod Datowe polo podate.
{prózdny} abo 0	1. špalta tabele je z polom zwjazana, kotrež je pod Datowe polo podate.
1	2. špalta tabela je z polom zwjazana, kotrež je pod Datowe polo podate.
2	3. špalta tabela je z polom zwjazana, kotrež je pod Datowe polo podate.

Wobsah zwjazaneje cele

Wubjerće modus lisćinoweho pola za zwjazowanje ze zwjazanej celu w tabelowym dokumenće.

1. Zwjazany wobsah: Tekstowy wobsah wubraneho zapiska lisćinoweho pola z celowym wobsahom synchronizować. Wubjerće „Wubrany zapisk“.

2. Zwjazana wuběranska pozicija: Pozicija jednotliweho wubraneho zapiska w lisćinowym polu so z numeriskej hódnotu w celi synchronizuje. Wubjerće „Pozicija wubraneho zapiska“.

Wobłuk žórłowych celow

Zapodajće celowy wobłuk, kotryž zapiski za lisćinowe polo abo kombinaciske polo w tabelowym dokumenće wobsahuje. Jeli wjacešpaltowy wobłuk zapodawaće, so jenož wobsah lěweje špalty wužiwa, zo by so wodźenski element pjelnił.

Zwjazana cela

Podawa poćah na zwjazanu celu w tabelowym dokumenće. Aktualny staw abo wobsah wodźenskeho elementa su z celowym wobsahom zwjazany. Slědowace tabele wodźenske elementy a jich wotpowědny zwjazanski typ nalistuja:

Kontrolny kašćik ze zwjazanej celu

Akcija	Wuslědk
Wubjerće kontrolny kašćik:	WĚRNO so do zwjazaneje cele zapodawa.
Znjemóžńće kontrolny kašćik:	WOPAK so do zwjazaneje cele zapodawa.
Kontrolny kašćik z třomi stawami so na „njewěsty“ staja:	#NV so do zwjazaneje cele zapodawa.
Zapodajće ličbu abo formlu, kotraž ličbu w zwjazanej celi wróća:	Jeli zapodata hódnota je WĚRNO abo nic 0: Kontrolny kašćik je wubrany. Jeli zapodata hódnota je WOPAK abo 0: Kontrolny kašćik wubrany njeje.
Zwjazanu celu wuprózdnić, tekst zapodać abo formlu zapodać, kotraž tekst abo zmylk wróća:	Kontrolny kašćik so na staw „njewěsty“ staja, jeli kontrolny kašćik je z třomi stawami, hewak so kontrolny kašćik znjemóžnja.
Wubjerće polo. Polo referencna hódnota tekst wobsahuje:	Tekst z pola Referencna hódnota so do cele kopěruje.
Znjemóžńće polo. Polo referencna hódnota tekst wobsahuje:	Prózdny znamješkowy rjećazk so do cele kopěruje.
Polo Referencna hódnota tekst wobsahuje. Zapodajće samsny tekst do cele:	Kontrolny kašćik so wuběra.
Polo Referencna hódnota tekst wobsahuje. Zapodajće druhi tekst do cele:	Kontrolny kašćik so znjemóžnja.

Opciske tłóčatko ze zwjazanej celu

Akcija	Wuslědk
Opciske tłóčatko wubrać:	WĚRNO so do zwjazaneje cele zapodawa.
Opciske tłóčatko so znjemóžnja, hdyž so druhe opciske tłóčatko wuběra:	WOPAK so do zwjazaneje cele zapodawa.
Zapodajće ličbu abo formlu, kotraž ličbu w zwjazanej celi wróća:	Jeli zapodata hódnota je WĚRNO abo nic 0: Opciske tłóčatko je wubrane. Jeli zapodata hódnota je WOPAK abo 0: Opciske tłóčatko wubrane njeje.
Zwjazanu celu wuprózdnić, tekst zapodać abo formlu zapodać, kotraž tekst abo zmylk wróća:	Opciske tłóčatko je znjemóžnjene.
Klikńće na opciske tłóčatko. Polo referencna hódnota tekst wobsahuje:	Tekst z pola Referencna hódnota so do cele kopěruje.
Klikńće na druhe opciske tłóčatko samsneje skupiny. Polo referencna hódnota tekst wobsahuje:	Prózdny znamješkowy rjećazk so do cele kopěruje.
Polo Referencna hódnota tekst wobsahuje. Zapodajće samsny tekst do cele:	Opciske tłóčatko je wubrane.
Polo Referencna hódnota tekst wobsahuje. Zapodajće druhi tekst do cele:	Opciske tłóčatko je wuprózdnjene.

Tekstowe polo ze zwjazanej celu

Akcija	Wuslědk
Tekst do tekstoweho pola zapodać:	Tekst so do zwjazaneje cele kopěruje.
Tekstowe polo wuprózdnić:	Zwjazana cela so wuprózdni.
Tekst abo ličbu do zwjazaneje cele zapodać:	Tekst abo ličba so do tekstoweho pola kopěruje.
Formlu do zwjazaneje cele zapodać:	Formlowy wuslědk so do tekstoweho pola kopěruje.
Zwjazanu celu wuprózdnić:	Tekstowe polo so wuprózdni.

Numeriske polo a formatěrowane polo ze zwjazanej celu

Akcija	Wuslědk
Ličbu do pola zapodać:	Ličba so do zwjazaneje cele kopěruje.
Polo wuprózdnić:	Hódnota 0 so w zwjazanej celi nastaja.
Zapodajće ličbu abo formlu, kotraž ličbu w zwjazanej celi wróća:	Ličba so do pola kopěruje.
Zwjazanu celu wuprózdnić, tekst zapodać abo formlu zapodać, kotraž tekst abo zmylk wróća:	Hódnota 0 so w polu nastaja.

Lisćinowe polo ze zwjazanej celu

Lisćinowe pola dwaj rozdźělnej zwjazanskej modusaj podpěruja, hlejće kajkosć „Wobsah zwjazaneje cele“.

1. Zwjazany wobsah: Tekstowy wobsah wubraneho zapiska lisćinoweho pola z celowym wobsahom synchronizować.

2. Zwjazana wuběranska pozicija: Pozicija jednotliweho wubraneho zapiska w lisćinowym polu so z numeriskej hódnotu w celi synchronizuje.

Akcija	Wuslědk
Jednotliwy lisćinowy zapisk wubrać:	Wobsah so zwjazuje: Tekst zapiska so do zwjazaneje cele kopěruje. Wuběr so zwjazuje: Pozicija wubraneho zapiska so do zwjazaneje cele kopěruje. Jeli so na přikład třeći zapisk wuběra, so ličba 3 kopěruje.
Wjacore lisćinowe zapiski wubrać:	#NV so do zwjazaneje cele zapodawa.
Wšě lisćinowe zapiski znjemóžnić:	Wobsah so zwjazuje: Zwjazana cela so wuprózdni. Wuběr so zwjazuje: Hódnota 0 so do zwjazaneje cele zapodawa.
Tekst abo ličbu do zwjazaneje cele zapodać:	Wobsah so zwjazuje: Jenaki lisćinowy zapisk pytać a wubrać. Wuběr so zwjazuje: Lisćinowy zapisk so na podatej poziciji (započinajo z 1 za prěni zapisk) wuběra. Jeli so ničo njenamaka, so wšě zapiski znjemóžnjeja.
Formlu do zwjazaneje cele zapodać:	Lisćinowy zapisk pytać a wubrać, kotryž formlowemu wuslědkej a zwjazanskemu modusej wotpowěduje.
Zwjazanu celu wuprózdnić:	Wotwolće wšě zapiski w lisćinowym polu.
Wobsah žórłoweho wobłuka lisćiny změnić:	Zapiski lisćinoweho pola so po změnje aktualizuja. Wuběr so wobchowa. Přez to da so zwjazana cela aktualizować.

Kombinaciske polo ze zwjazanej celu

Akcija	Wuslědk
Zapodajće tekst do zapodawanskeho pola kombinaciskeho pola, abo wubjerće zapisk z wuběranskeje lisćiny:	Tekst so do zwjazaneje cele kopěruje.
Zapodawanske polo kombinaciskeho pola wuprózdnić:	Zwjazana cela so wuprózdni.
Tekst abo ličbu do zwjazaneje cele zapodać:	Tekst abo ličba so do zapodawanskeho pola kombinaciskeho pola kopěruje.
Formlu do zwjazaneje cele zapodać:	Formlowy wuslědk so do zapodawanskeho pola kombinaciskeho pola kopěruje.
Zwjazanu celu wuprózdnić:	Zapodawanske polo kombinaciskeho pola so wuprózdni.
Wobsah žórłoweho wobłuka lisćiny změnić:	Zapiski wuběranskeje lisćiny so po změnje aktualizuja. Zapodawanske polo kombinaciskeho pola a zwjazana cela so njezměnitej.