Trendowe linije

Trendowe linije dadźa so wšěm typam 2D-diagramow nimo kružnych a hrjadowych diagramow přidać.

1. Zo byšće trendowu liniju za datowy rjad zasadźił, klikńće najprjedy dwójce na diagram, zo byšće do wobdźěłanskeho modusa zastupił a wubjerće datowy rjad w diagramje, za kotryž chceće trendowu liniju wutworić.

2. Wubjerće Zasadźić – Trendowa linija abo klikńće z prawej tastu na datowy rjad, zo byšće kontekstowy meni wočinił a wubjerće Trendowu liniju zasadźić.

3. Linije přerězneje hódnoty su wosebite trendowe linije, kotrež přerěznu hódnotu pokazuja. Wužiwajće Zasadźić – Linije přerězneje hódnoty, zo byšće linije přerězneje hódnoty za datowe rjady zasadźił.

4. Zo byšće trendowu liniju abo liniju přerězneje hódnoty zhašał, klikńće na liniju a tłóčće potom tastu Entf.

Trendowa linija ma samsnu barbu kaž wotpowědny datowy rjad. Zo byšće linijowe kajkosće změnił, wubjerće trendowu liniju a potom Format – Wuběr formatěrować… – Rajtark: Linija.

Runica trendoweje linije a determinaciski koeficient

Hdyž diagram je we wobdźěłanskim modusu, LibreOffice wam runicu trendoweje linije a determinaciski koeficient R² wobličuje, byrnjež njebyštej so pokazałoj: Klikńće na trendowu liniju, zo byšće informacije w statusowej lajsće widźał.

Zo byšće runicu trendoweje linije pokazał, wubjerće trendowu liniju w diagramje, klikńće z prawej tastu, zo byšće kontekstowy meni wočinił, a wubjerće Runicu trendoweje linije zasadźić.

Zo byšće format hódnotow změnił (mjenje signifikantnych městnow abo wědomostnu notaciju wužiwać), wubjerće runicu w diagramje, klikńće z prawej tastu, zo byšće kontekstowy meni wočinił a wubjerće Runicu trendoweje linije formatěrować… – Rajtark: Ličby.

Standardna runica x jako abscisowu wariablu wužiwa a f(x) jako ordinatowu wariablu. Zo byšće tute mjena změnił, wubjerće trendowu liniju, potom Format – Wuběr formatěrować… – Rajtark: Typ a zapodajće mjena do tekstoweju polow Mjeno wariable X a Mjeno wariable Y.

Zo byšće determinaciski koeficient R² pokazał, wubjerće runicu w diagramje, klikńće z prawej tastu, zo byšće kontekstowy meni wočinił a wubjerće R² zasadźić.

Křiwkowe typy trendowych linijow

Slědowace regresijne typy su k dispoziciji:

• Linearna trendowa linija: regresija přez runicu y=a·x+b. Wotrězk b da so wunuzować.

• Polynomialna trendowa linija: regresija přez runicu y=Σ_i(a_i∙xⁱ). Wotrězk a₀ da so wunuzować. Stopjeń polynoma dyrbi daty być (znajmjeńša 2).

• Logaritmiska trendowa linija: regresija přez runicu y=a∙ln(x)+b.

• Eksponencialna trendowa linija: regresija přez runicu y=b∙exp(a∙x). Tuta runica je z y=b∙m^x za m=exp(a) ekwiwalentna. Wotrězk b da so wunuzować.

• Potencowa trendowa linija: regresija přez runicu y=b∙x^a.

• Pohibliwy přerězk jako trendowa linija: jednory pohibliwy přerězk so z n předchadnymi y-hódnotami wobličuje, při čimž n je perioda. Runica za tutu trendowu liniju k dispoziciji njeje.

Wobmjezowanja

Wobličenje trendoweje linije jenož datowe pory ze slědowacymi hódnotami wobkedźbuje:

• Logaritmiska trendowa linija: Jenož pozitiwne x-hódnoty so wobkedźbuja.

• Eksponencialna trendowa linija: Jenož pozitiwne y-hódnoty so wobkedźbuja, chibazo wšě y-hódnoty su negatiwne: Regresija potom runicy y=-b∙exp(a∙x) slěduje.

• Potencowa trendowa linija: Jenož pozitiwne x-hódnoty so wobkedźbuja; jenož pozitiwne y-hódnoty so wobkedźbuja, chibazo wšě y-hódnoty su negatiwne: Regresija budźe potom runicy y=-b∙x^a slědować.

Přetworće swoje daty wotpowědnje; najlěpje dźěłaće z kopiju originalnych datow a přetworjeće kopěrowane daty.

Parametry w Calc wobličić

Móžeće tež parametry z pomocu slědowacych funkcijow Calc wobličić.

Linearna regresijna runica

Linearna regresija runicy y=m*x+b slěduje.

m = POSTUP(Daty_Y;Daty_X)

b=WÓSKOWOTRĚZK(Daty_Y ;Daty_X)

Wobličće determinaciski koeficient přez

r² = MĚRAPOSTAJENOSĆE(Data_Y;Data_X)

Nimo toho m, b a r² pólna funkcijaRGP přidatnu statistiku za regresijnu analyzu dodawa.

Runica logaritmiskeje regresije

Logaritmiska regresija runicy y=a*ln(x)+b slěduje.

a = POSTUP(Daty_Y;LN(Daty_X))

b=WÓSKOWOTRĚZK(Daty_Y ;LN(Daty_X))

r² = MĚRAPOSTAJENOSĆE(Data_Y;LN(Data_X))

Eksponencialna regresijna runica

Za eksponencialne trendowe linije so přetworjenje do linearneho modela wotměwa. Optimalne křiwkowe přiměrjenje so na linearny model poćahuje a wuslědki so wotpowědnje interpretuja.

Eksponencialna regresija runicy y=b*exp(a*x) abo y=b*m^x slěduje, kotraž so do ln(y)=ln(b)+a*x resp. ln(y)=ln(b)+ln(m)*x přetworja.

a = POSTUP(LN(Daty_Y);Daty_X)

Wariable za druhu wariaciju so takle wobličuja:

m = EXP(POSTUP(LN(Data_Y);Data_X))

b=EXP(WÓSKOWOTRĚZK(LN(Daty_Y);Daty_X))

Wobličće determinaciski koeficient přez

r² = MĚRAPOSTAJENOSĆE(LN(Daty_Y);Daty_X)

Nimo toho m, b a r² pólna funkcijaRKP přidatnu statistiku za regresijnu analyzu dodawa.

Potencowa regresijna runica

Za křiwki potencoweje regresije so přetworjenje do linearneho modela wotměwa. Potencowa regresija runicy y=b*x^a slěduje, kotraž so do ln(y)=ln(b)+a*ln(x) přetworja.

a = POSTUP(LN(Daty_Y);LN(Daty_X))

b=EXP(WÓSKOWOTRĚZK(LN(Daty_Y);LN(Daty_X))

r² = MĚRAPOSTAJENOSĆE(LN(Daty_Y);LN(Daty_X))

Polynomialna regresijna runica

Za křiwki polynomialneje regresije so přetworjenje do linearneho modela wotměwa.

Wutworće tabelu ze špaltami x, x², x³, …, xⁿ, y hač k požadanemu stopnjej n.

Wužiwajće formlu =RGP(Daty_Y, Daty_X) z dospołnym wobłukom x do xⁿ (bjez nadpismow) jako Daty_X.

Prěnja linka wudaća RGP koeficienty regresijneho polynoma wobsahuje, z koeficientom xⁿ cyle nalěwo.

Prěni element třećeje linki wudać RGP je hódnota r². Hlejće funkciju RGP za podrobnosće wo prawym wužiwanju a wujasnjenje druhich wudaćowych parametrow.