Control remoto da presentación - Guía de uso do Impress Remote

O Impress Remote do LibreOffice é unha aplicación de código aberto dispoñíbel para os sistemas operativos Android e iOS que permite controlar as presentacións de diapositivas do Impress do LibreOffice cun dispositivo móbil.

O Impress Remote mostra miniaturas das diapositivas na pantalla do dispositivo coas notas correspondentes por baixo. Pase o dedo pola pantalla para avanzar ou retroceder na presentación. Tamén pode mostrar un mosaico coas diapositivas para saltar directamente á que desexa e tornar a presentación máis dinámica.

A conexión entre o computador que está a executar a presentación co Impress do LibreOffice e o dispositivo móbil realízase a través de Bluetooth ou dunha ligazón de rede.

Funcionalidades do Impress Remote

O Impress Remote é unha aplicación moi útil que permite controlar presentacións a certa distancia do computador, permitindo camiñar ao tempo que se fai a presentación. As súas funcionalidades principais son:

• Controlar a presentación con xestos cos dedos e toques na pantalla do dispositivo móbil.

• As animacións dos obxectos das diapositivas actívanse con toques na pantalla do dispositivo móbil.

• Visualizacións previas das diapositivas: pódense previsualizar as diapositivas da presentación cando o computador e o dispositivo están os dous conectados.

• Notas da presentación: existe unha sección exclusiva de notas da presentación por debaixo das diapositivas no dispositivo móbil na que se ven todas as notas das diapositivas.

• Temporizador: configura o tempo que se mostran as presentacións automáticas.

• Punteiro visual: mostra un «punteiro láser» na pantalla do computador controlado pola posición do dedo na miniatura da diapositiva no dispositivo móbil.

Requisitos:

Computador:

• GNU/Linux, Windows ou macOS.

• Conectividade por Bluetooth ou rede.

• LibreOffice versión 4.1 ou posterior

Dispositivo móbil:

• Un teléfono ou tablet con Android 2.3 ou superior ou iOs, con conectividade por Bluetooth ou rede.

• A aplicación Impress Remote instalada no dispositivo móbil.

Descargar e instalar o Impress Remote no dispositivo móbil.

Descargue o Impress Remote desde o Google Play Store ou do Apple Store buscando «Impress Remote» na caixa de busca. Comprobe que os resultados mostran que o Impress Remote é o da The Document Foundation (TDF). Instale o Impress Remote no dispositivo móbil como calquera outra aplicación.

Configuración do Impress Remote

Co Impress Remote activado no dispositivo móbil e na páxina Computador, acceda á páxina Configuración tocando na esquina dereita da pantalla. As opcións seguintes están dispoñíbeis:

• Accións das teclas de volume: marque para permitir que as teclas de volume do dispositivo avancen na presentación ao premer a tecla de aumentar o volume ou que recúen ao premer a tecla de baixar o volume.

• Manter pantalla prendida: marque para evitar que a pantalla do dispositivo se apague e bloquee mentres emprega o Impress Remote.

• Modo silencioso: coloque o dispositivo en modo silencioso para evitar notificacións de son ou chamadas entrantes ou outras mensaxes. Esta opción non afecta o modo de vibración que teña definido previamente.

Conectar o computador ao dispositivo móbil

Active o Bluetooth no dispositivo e no computador e emparélleos. Consulte os manuais de instrucións do dispositivo e do sistema operativo do computador para saber como activar o Bluetooth, configurar un identificador de Bluetooth e emparellar dispositivos. Unha vez emparellados, o dispositivo móbil xa pode controlar a persentación.

Alternativamente, pode conectar a través dunha rede (incluída Wi-Fi). Neste caso, tanto o computador como o dispositivo deben estar conectados á mesma rede.

Activar o control co Impress Remote no Impress do LibreOffice

Para executar unha presentación con Impress ten que permitir que o Impress sexa controlado polo dispositivo móbil. Proceda do seguinte xeito:

1. Abra o Impress do LibreOffice.

2. Abra a caixa de diálogo Configuración da presentación de diapositivas.

3. En Control remoto, seleccione a opción Activar control remoto e prema Aceptar. Debería ver a pantalla que se mostra na imaxe

   

4. Peche o Impress do LibreOffice e inícieo de novo.

Control da presentación de diapositivas:

1. Comprobe que tanto o dispositivo como o computador están emparellados por Bluetooth ou por unha conexión de rede.

2. Abra a presentación que desexe mostrar no Impress do LibreOffice.

3. Abra a aplicación Impress Remote no dispositivo móbil e seleccione o identificador de Bluetooth do computador.

4. Despois de premer no nome do computador, este carga automaticamente as diapositivas da presentación no Impress Remote coa sección de notas.

5. Pase o dedo para a esquerda ou dereita da pantalla do móbil para cambiar as diapositivas. As notas das diapositivas están na parte inferior da pantalla do móbil.

6. Opcionalmente, estabeleza o temporizador para cada diapositiva na aplicación do móbil.

7. Tamén pode cambiar as diapositivas coas teclas de volume do dispositivo móbil. Para activar isto, abra a configuración e active as accións das teclas de volume no Impress Remote.

Algunhas capturas de pantalla do Impress Remote: