Aplicar formato condicional

Ao empregar a orde do menú Formato - Condicional - Condición a caixa de diálogo permite definir condicións por cela, que se deben cumprir para que as celas seleccionadas teñan un formato determinado.

Co formato condicional pode, por exemplo, realzar os totais que excedan o valor medio de todos os totais. Se os totais cambian o formato cambia en consecuencia, sen ter que aplicar outros estilos manualmente.

Para definir as condicións

1. Seleccione as celas ás que desexe aplicar un estilo condicional.

2. Escolla Formato - Condicional - Condición.

3. Introduza a(s) condición(s) na caixa de diálogo. A caixa de diálogo descríbese en detalle na Axuda do LibreOffice e hai un exemplo aquí abaixo:

Exemplo de formato condicional: Realzar os totais que estean por encima ou por debaixo do valor medio

Paso 1: Xerar os valores numéricos

Imaxine que quere destacar determinados valores das táboas. Por exemplo, nunha táboa de produtividade pode mostrar todos os valores que superen a media en verde e os inferiores en vermello. Isto é posíbel co formato condicional.

1. En primeiro lugar, cree unha táboa con varios valores diferentes. Para esta proba pode crear táboas con números ao chou:

   Nunha das celas introduza a fórmula =ALEATORIO(), coa que obterá un número ao chou entre 0 e 1. Se quere enteiros entre 0 e 50 introduza a fórmula =ENT(ALEATORIO()*50).

2. Copie a fórmula para crear unha fila de números aleatorios. Prema no canto inferior dereito da cela seleccionada e arrastre para a dereita até seleccionar o intervalo de celas desexado.

3. Do mesmo xeito que se describiu arriba, arrastre o canto da cela que está máis á dereita para crear máis filas de números ao chou.

Paso 2: Definir os estilos de cela

O seguinte paso é aplicar un estilo de cela a todos os valores que representen produtividade superior á media e outro aos que estean por debaixo. Asegúrese que a xanela Estilos é visíbel antes de preoseguir.

1. Prema nunha cela en branco e seleccione a orde Formatar celas no menú de contexto.

2. Na caixa de diálogo Formatar celas da lapela Fondo prema no botón Cor e seleccione unha cor de fondo. Prema Aceptar.

3. No panel Estilos da barra lateral prema na icona Novo estilo a partir da selección. Introduza o nome do novo estilo. Para este exemplo, déalle o nome «Arriba»

4. Para definir un segundo estilo prema de novo nunha cela en branco e proceda como se describiu antes. Asígnelle unha cor de fondo diferente á cela e déalle un nome (neste exemplo, «Abaixo»).

Paso 3: Calcular a media

No noso exemplo específico estamos a calcular a media dos valores aleatorios. O resultado colócase nunha cela:

1. Coloque o cursor nunha cela en branco, J14, por exemplo, e escolla Inserir - Función.

2. Seleccione a función MEDIA. Empregue o rato para seleccionar todos os números aleatorios. Se non pode ver o intervalo enteiro porque o asistente de funcións o tapa, pode encoller esta caixa de diálogo temporalmente empregando a icona Encoller.

3. Peche o asistente de funcións con Aceptar.

Paso 4: Aplicar os estilos de cela

Agora xa pode aplicar o formato condicional á folla:

1. Seleccione todas as celas que teñen os números ao chou.

2. Escolla a orde Formato - Condicional - Condición para abrir a caixa de diálogo correspondente.

3. Defina as condicións deste xeito: Se o valor da cela é inferior a $J$14, formate co estilo de cela «Abaixo» e se o valor da cela é superior ou igual a $J$14 formate co estilo de cela «Arriba».

Paso 5: Copiar o estilo de cela

Para aplicar posteriormente o formato condicional a outras celas:

1. Prema nunha das celas que recibiu formato condicional.

2. Copie a cela ao portapapeis.

3. Seleccione as celas que van recibir este mesmo formato.

4. Escolla Editar - Pegado especial - Pegado especial. Aparece a caixa de diálogo Pegado especial.

5. Na área Pegar, prema na caixa Formatos. O resto das caixas deben estar desmarcadas. Prema en Aceptar. No canto disto, tamén pode premer no botón Só formatos.