Kurbak marraztea

Kurba ikonoak, Marrazkia tresna-barran dagoenak, Bézier kurbak marrazteko tresna-barra bat irekitzen du. Bézier kurbak hasiera-puntu batekin eta amaiera-puntu batekin definitzen dira, eta puntu horiei "aingura" esaten zaie. Bézier kurba baten kurbadura-maila kontrol-puntuek ("heldulekuek") definitzen dute. Kontrol-puntu bat lekuz aldatzen bada, Bézier kurbaren forma aldatzen da.

Bézier kurben segmentuak eta marra zuzenen segmentuak elkartu daitezke Bézier kurba konplexuagoak osatzeko. Hiru trantsizio desberdin aplika daitezke elkarren ondoko segmentuak elkartzeko.

• Aingura-puntu simetriko batek lerro-kurbadura berdina dauka bi aldeetan, eta bi kontrol-lerroak batera mugitzen dira lerro zuzena balitz bezala.

• Aingura-puntu leun batek lerro-kurbadura desberdina eduki dezake bi aldeetan.

• Izkinako aingura-puntu batek kontrol-lerro independente bat edo bi izaten ditu. Alde bat aldatzeak ez du eraginik beste aldean.

Nola erabili Kurba tresna

1. Marrazkien tresna-barran, ireki Kurbak tresna-barra, eta hautatu Kurba tresna.

2. Egin klik kurba hastea nahi duzun lekuan, eta arrastatu kurba joatea nahi duzun norabidean. Kontrol-marrak adieraziko du norabidea.

   Norabidea 45 graduko sareetara mugatzeko, mantendu sakatuta ⇧ tekla.

3. Askatu sagua lehen kontrol-puntua kokatu nahi duzun lekuan.

4. Eraman erakuslea kurba-segmentua amaitzea nahi duzun lekura. Kurbak erakusleari jarraitzen dio.

5. Egin ekintza hauetako bat:

• Marra marraztea amaitzeko, egin klik bikoitza amaiera-puntuaren kokalekuan.

  Forma itxi bat sortzeko, egin klik bikoitza marraren hasiera-puntuan.

• Aingura-puntu bat gehitzeko, egin klik eta askatu saguaren botoia. Hurrengo segmentua marrazteko, mugitu sagua.

• Aingura-puntu leun bat gehitzeko, egin klik eta arrastatu edozein norabidetan.

Nola erabili Forma Libreko Marraren tresna

1. Marrazkien tresna-barran, ireki Kurbak tresna-barra eta hautatu Forma libreko marra tresna.

2. Egin klik kurba hastea nahi duzun lekuan, eta mantendu sakatuta saguaren botoia.

3. Marraztu forma libreko marra arkatz batekin egingo bazenu bezala.

4. Marra amaitzeko, askatu saguaren botoia.