Pomoc za LibreOffice 24.2
LibreOffice Writer wam zmóžnja, tekstowe dokumenty naceriś a napóraś, kótarež mógu grafiki, tabele abo diagramy wopśimowaś. Móžośo pón dokumenty we wjele formatach składowaś, mjazy nimi standardizěrowany format OpenDocument (ODF), format Microsoft .doc abo HTML. A móžośo swój dokument lažko do formata Portable Document Format (PDF) eksportěrowaś.
LibreOffice Writer wam zmóžnja jadnore dokumenty ako mema fakse, listy, pisma wó pśistajenja a serijowe listy ako teke dłujke a kompleksne abo wěcejźělowe dokumenty z literaturnymi zapisami, referencnymi tabelami a gronidłowymi zapisami.
LibreOffice Writer teke take wužytne funkcije ako pšawopisnu kontrolu, tezawrus, awtomatisku korekturu a źělenje złožkow a mimo togo wjele pśedłogow za skóro kuždy zaměr wopśimujo. Móžośo teke swójske pśedłogi z asistentami napóraś.
LibreOffice wjele móžnosćow za wugótowanje dokumentow bitujo. Wužywajśo wokno Pśedłogi, aby pśedłogi za wótstawki, jadnotliwe znamuška, wobłuki a boki napórał, pśipokazał a změnił. Mimo togo Nawigator wam pomaga, se malsnje we wašych dokumentach gibnuś, zmóžnja wam, se waš dokument w rozrědowańskem naglěźe woglědaś a wobchowujo pśeglěd nad objektami, kótarež sćo zasajźił do swójogo dokumenta.
Móžośo teke wšake zapise a tabele w tekstowych dokumentach napóraś. Móžośo strukturu a naglěd zapisow a tabelow pó swójich wósobinskich pótrjebnosćach definěrowaś. Z aktiwnymi hyperwótkazami a cytańskimi znamjenjami móžośo direktnje k wótpowědnym městnam w teksće skócyś.
LibreOffice Writer wjele DTP- a kreslańske rědy wopśimujo, kótarež wam pomagaju, profesionelnje wugótowane dokumenty ako na pśikład brošurki, newslettery abo pśepšosby napóraś. Móžośo swóje dokumenty w někotarych słupach, z wobłukami, grafikami, tabelami a drugimi objektami formatěrowaś.
Tekstowe dokumenty w LibreOffice maju integrěrowanu liceńsku funkciju, kótaraž wam pomaga, wupominajuce woblicenja abo logiske zwězanja wuwjasć. Móžośo lažko tabelu w tekstowem dokumenśe napóraś, aby woblicenja pśewjadł.
Kreslański rěd LibreOffice Writer wam zmóžnja, kreslanki, grafiki, legendy a druge typy kreslankow direktnje w tekstowych dokumentach napóraś.
Móžośo wobraze z rozdźělnymi formatami do tekstowego dokumenta zasajźiś, mjazy nimi grafiki w formaśe JPG abo GIF. Mimo togo bitujo Galerija zběrku clipartow a galerija Fontwork wjelicne pismowe efekty napórajo.
Programowy pówjerch jo tak nacerjony, až móžośo jen pó swójich nastajenjach konfigurěrowaś, mjazy drugim móžośo symbole a menije pśiměriś. Móžośo wšake programowe wokna pozicioněrowaś, na pśikład wokno Pśedłogi abo Nawigator ako znosujuce se wokno něźi na wobrazowce. Móžośo teke někotare wokna ku kšomje źěłoweho wobceŕka pśidokowaś.
Funkcija Śěgnuś a pušćiś wam zmóžnja, malsnje a eficientnje z tekstowymi dokumentami w LibreOffice źěłaś. Móžośo objekty, na pśikład grafiki z galerije, wót jadnogo městna do drugego w samskem dokumenśe abo mjazy wócynjonymi dokumentami LibreOffice śěgnuś a pušćiś.
Móžośo system pomocy ako dopołnu referencu za nałoženja LibreOffice wužywaś, mjazy nimi instrukcije za jadnore a kompleksne nadawki.