Zapiski (zapis wopśimjeśa)

Pódajśo format zapiskow w zapisu wopśimjeśa.

Pśistup k toś tomu pśikazoju …

Wubjeŕśo Zasajźiś – Zapis wopśimjeśa a gronidłowy zapis – Zapis wopśimjeśa, gronidłowy zapis abo zapis literatury… – Rejtarik: Zapiski (gaž zapis wopśimjeśa jo wubrany typ)

Rownina

Wubjeŕśo rowninu, kótaruž cośo definěrowaś.

Struktura a formatěrowanje

Smužka Struktura definěrujo, kak su zapiski w zapisu zestajone. Aby naglěd zapiska změnił, móžośo kody abo tekst do proznych pólow na toś tej smužce zapódaś. Móžośo teke do proznego póla abo na kod kliknuś a pón na kodowy tłocašk.

Aby kod ze smužki Struktura wulašował, klikniśo na kod a tłocćo pón tastu Entf na swójej tastaturje.
Aby kod ze smužki Struktura wuměnił, klikniśo na kod a pón na kodowy tłocašk.

Aby smužce Struktura kod pśidał, klikniśo do proznego póla a pón na kodowy tłocašk.

Numerěrowanje (N#)

Zasajźujo numer nadpisma abo lisćinowy numer zapiska. Aby numerěrowanje nadpismow zmóžnił, wubjeŕśo Rědy – Numerěrowanje nadpismow….

Zapiskowy tekst (E)

Zasajźujo tekst wubranego zapiska.

Tabulator (T)

Zasajźujo tabulator. Aby tabulatoroju zachopinajuce dypki pśidał, wubjeŕśo znamuško w pólu Połnjeńske znamuško. Aby poziciju tabulatora změnił, zapódajśo gódnotu w pólu Tabulatorowa pozicija abo wubjeŕśo kontrolny kašćik Napšawo wusměriś.

Numer boka (#)

Zasajźujo numer boka zapiska.

Hyperwótkaz (LS a LE)

Napórajo hyperwótkaz za źěl zapiska, kótaryž z wócynjajucym (LS) a zacynjajucym (LE) wobznamjenim hyperwótkaza wobdawaśo. Klikniśo na smužce Struktura do proznego póla pśed źělom, za kótaryž cośo hyperwótkaz napóraś a klikniśo pón na toś ten tłocašk. Klikniśo do proznego póla za źělom, kótaremuž cośo hyperwótkaz pśidaś a pón znowego na toś ten tłocašk. Wšykne hyperwótkaze muse jadnorazowe byś.

Wšykne

Nałožujo aktualne nastajenja na wšykne rowniny, bźez togo, aby se dialog zacynił.

Znamjenjowa pśedłoga

Pódajśo znamjenjowu pśedłogu za wubrany symbol w smužce Struktura.

Wobźěłaś

Wócynja dialog, źož móžośo wubranu znamjenjowu pśedłogu wobźěłaś.

Pśiduce tśi nastajenja su k dispoziciji, gaž se symbol T wuběra.

Połnjece znamuško

Wubjeŕśo tabulatorowe połnjece znamuško, kótarež cośo wužywaś.

Tabulatorowa pozicija

Zapódajśo wótkłon, kótaryž se ma mjazy lěweju kšomu boka a tabulatorom wóstajiś.

Napšawo wusměriś

Wusměrjujo tabulator na pšawej kšomje boka.

Pśiducej dwě nastajeni stej k dispoziciji, gaž se symbol N# wuběra.

Format

Jano widobny, gaž na tłocašk N# w smužce Struktura klikaśo. Wubjeŕśo to, aby numer nadpisma ze źěleńskim znamuškom abo bźez źěleńskego znamuška pokazał.

Až do rowniny pokazaś

Zapódajśo maksimalnu licbu rowninow numera nadpisma, kótarež so maju pokazaś. Wubjeŕśo na pśikład „3“, aby až do tśich rowninow pokazał. Jolic numer nadpisma ma mjenjej ako tśi rowniny, se napšawdny numer pokažo.

Format

Tabulatorowa pozicija relatiwna k zasunjenjeju wótstawkoweje pśedłogi

Pozicioněrujo tabulator relatiwnje ku gódnośe „Zasunjenje wótlěwa“, kótaraž jo we wótstawkowej pśedłoze na rejtariku Pśedłogi definěrowana. Howac se tabulator relatiwnje k lěwej tekstowej kšomje pozicioněrujo.