Wuměnjenja definěrowaś

Wuměnjenja su logiske wuraze, kótarež móžośo wužywaś, aby pokazanje pólow a wótrězkow w swójom dokumenśe pokazał. Lěcrownož slědujuce pśikłady za póla płaśe, nałožuju se teke na wótrězki.

Móžośo wuměnjenja za slědujuce pólne typy definěrowaś:

1. Wuměnity tekst: Pokazujo tekst A, jolic wuměnjenje jo docynjone abo tekst B, jolic wuměnjenje jo njedocynjone.

2. Schowany tekst: Schowajo wopśimjeśe póla, jolic wuměnjenje jo docynjone.

3. Schowany wótstawk: Schowajo wótstawk, jolic wuměnjenje jo docynjone.

4. Někaka datowa sajźba a pśiduca datowa sajźba: Wóźi pśistup k datowym sajźbam datoweje banki.

Nejjadnorjejša móžnosć, aby wuměnjenje definěrował, jo direktne zapódawanje logiskego wuraza do póla Wuměnjenje z pomocu slědujucych gódnotow:

WĚRNO	Wuměnjenje jo pśecej docynjone. Móžośo teke drugu gódnotu ako 0 ako tekst wuměnjenja zapódaś.
WOPAK	Wuměnjenje njejo docynjone. Móžośo teke gódnotu 0 zapódaś.

Jolic wuměnjenje definěrujośo, wužywajśo samske elementy, aby formulu definěrował, na pśikład pśirownańske operatory, matematiske a statistiske funkcije, licbowe formaty, wariable a konstanty.

Móžośo slědujuce typy wariablow wužywaś, gaž wuměnjenje definěrujośo:

1. Pśeddefiněrowane wariable LibreOffice, kótarež statistiku wó kakosćach dokumentow wužywaju

2. Swójske wariable, kótarež se z pólom „Wariablu nastajiś“ napóraju

3. Wariable na zakłaźe wužywaŕskich datow

4. Wariable na zakłaźe wopśimjeśa pólow datoweje banki

Njamóžośo nutśikowne wariable ako na pśikład numery boka abo kapitelow we wuměnjeńskem wurazu wužywaś.

Wuměnjenja a wariable

Slědujuce pśikłady wariablu z mjenim „x“ wužywaju:

x == 1 abo x EQ 1	Wuměnjenje jo docynjone, jolic „x“ jo jadnak 1.
x != 1 abo x NEQ 1	Wuměnjenje jo docynjone, jolic „x“ njejo jadnak 1.
sinx == 0	Wuměnjenje jo docynjone, jolic „x“ jo wjelesere licby Pi.

Aby pśirownańske operatory ze znamjenjowymi rjeśazkami wužywał, muse se operandy z dwójnymi pazorkami wobdaś:

x == "ABC" abo x EQ "ABC"	Pśeglědujo, lěc wariabla „x“ znamjenjowy rjeśazk"ABC" wopśimujo (wěrno = wuměnjenje jo docynjone) abo nic (wopak = wuměnjenje njejo docynjpone).
x == "" abo x EQ "" abo !x abo NOT x	Pśeglědujo, lěc wariabla „x“ prozny znamjenjowy rjeśazk wopśimujo.

Wužywaŕske daty

Móžośo wužywaŕske daty zapśimjeś, gaž wuměnjenja definěrujośo. Aby swóje wužywaŕske daty změnił, wubjeŕśo – LibreOffice – Wužywaŕske daty. Wužywaŕske daty muse se we formje znamjenjowych rjeśazkow zapódaś. Móžośo wužywaŕske daty z "==" (EQ), "!=" (NEQ) abo "!"(NOT) wótpšašowaś.

Slědujuca tabela wariable wužywaŕskich datow a jich wóznamy nalicyjo:

Wariabla	Wóznam
user_firstname	Pśedmě
user_lastname	Familijowe mě
user_initials	Iniciale
user_company	Pśedewześe
user_street	Droga
user_country	Kraj
user_zipcode	Postowa licba
user_city	Město
user_title	Titel
user_position	Pozicija
user_tel_work	Słužbny telefonowy numer
user_tel_home	Priwatny telefonowy numer
user_fax	Faksowy numer
user_email	E-mailowa adresa
user_state	Stat (nic we wšych wersijach LibreOffice)

Aby na pśikład wótstawk, tekst abo wótrězk pśed wužywarjom z wěstymi inicialami schował, na pśikład „LM“, zapódajśo wuměnjenje: user_initials=="LM".

Wuměnjenja a póla datoweje banki

Móžośo wuměnjenja za pśistup k datowym bankam abo pólam datoweje banki definěrowaś. Móžośo na pśikład wopśimjeśe póla datoweje banki z wuměnjenja pśeglědowaś abo póla datoweje banki w logiskich wurazach wužywaś. Slědujuca tabela někotare dalšne pśikłady nalicyjo, kak se datowe banki we wuměnjenjach wužywaju:

Pśikład	Wóznam
Datowa_banka.Tabela.Pśedewześe Datowa_banka.Tabela. Pśedewześe NEQ "" Datowa_banka.Tabela.Pśedewześe !=""	Wuměnjenje jo docynjone, jolic pólo PŚEDEWZEŚE njejo prozne. (W prědnem pśikłaźe operator njejo trjebny.)
!Datowa_banka.Tabela.Pśedewześe NOT Datowa_banka.Tabela.Pśedewześe Datowa_banka.Tabela.Pśedewześe EQ "" Datowa_banka.Tabela.Pśedewześe ==""	Wrośijo WĚRNO, jolic pólo PŚEDEWZEŚE jo prozne.
Datowa_banka.Tabela.Pśedewześe !="Sun" Datowa_banka.Tabela.Pśedewześe NEQ "Sun"	Wrośijo WĚRNO, jolic aktualny zapisk w pólu PŚEDEWZEŚE njejo "Sun". (Wuwołak logiske NOT reprezentěrujo.)
Datowa_banka.Tabela.Pśedmě AND Datowa_banka.Tabela.Mě	Wrośijo WĚRNO, jolic datowa sajźba pśedmě a familijowe mě wopśimujo.

Jolic se na pólo datoweje banki we wuměnjenju póśěgujośo, wužywajśo formu Mědatowejebanki.Mětabele.Měpóla. Jolic jadno z mjenjow znamuško wopśimujo, kótarež jo operator, na pśikład minusowe znamuško (-), stajśo mě do rožkatych spinkow, na pśikład Mědatowejebanki.[Mě-tabele].Měpóla. Njewužyjśo nigda prozne znamjenja w pólnych mjenjach.

Pśikład: Prozne pólo datoweje banki schowaś

Cośo snaź wuměnjenje napóraś, kótarež prozne pólo chowa, na pśikład, jolic pólo PŚEDEWZEŚE jo prozne za někotare datowe sajźby.

Wubjeŕśo lisćinowy zapisk Schowany wótstawk a zapódajśo slědujuce wuměnjenje: Adresnik.Adresy.Pśedewześe EQ ""

abo

NOT Adresnik.Adrese.Pśedewześe

Jolic pólo datoweje banki PŚEDEWZEŚE jo prozne, jo wuměnjenje docynjone a wótstawk jo schowany.

Pśikłady za wuměnjenja w pólach

Slědujuce pśikłady pólo Wuměnity tekst wužywaju, lěcrownož daju se na wšykne póla nałožyś, kótarež su z wuměnjenim zwězane. Syntaksa, kótaraž se za wuměnjenja wužywa, se tež za póla Schowany tekst, Schowany wótstawk, Někaka datowa sajźba abo Pśiduca datowa sajźba wužywa.

Wuměnity tekst na zakłaźe licby bokow pokazaś:

1. Wubjeŕśo Zasajźiś – Pólo – Dalšne póla… a klikniśo pón na rejtarik Funkcije.

2. Klikniśo w lisćinje Typ na „Wuměnity tekst“.

3. Zapódajśo "page == 1" do póla Wuměnjenje.

4. Zapódajśo „Dajo jano jaden bok“ do póla Pón.

5. Zapódajśo „Dajo někotare boki“ do póla Abo.

6. Klikniśo na Zasajźiś a pón na Zacyniś.

Wuměnity tekst na zakłaźe swójskeje wariable pokazaś

1. Wubjeŕśo Zasajźiś – Pólo – Dalšne póla… a klikniśo pón na rejtarik Wariable.

2. Klikniśo w lisćinje Typ na „Wariablu nastajiś“.

3. Zapódajśo „Wudobytk“ do póla Mě.

4. Zapódajśo „5000“ do póla Gódnota.

5. Klikniśo na Zasajźiś.

6. Klikniśo na rejtarik Funkcije a pón na „Wuměnity tekst“ w lisćinje Typ.

7. Zapódajśo „Wudobytk < 5000“ do póla Wuměnjenje.

8. Zapódajśo „Cel njejo dojśpjony“ do póla Pón.

9. Zapódajśo „Cel jo dojśpjony“ do póla Abo.

10. Klikniśo na Zasajźiś.

Aby wopśimjeśe wariable „Wudobytk“ wobźěłał, klikniśo dwójcy na wariablowe pólo.

Wuměnity tekst na zakłaźe wopśimjeśa póla datoweje banki pokazaś:

Prědny źěl toś togo pśikłada prozne znamje mjazy póloma „Pśedmě“ a „Familijowe mě“ w dokumenśe zasajźujo, a drugi źěl tekst na zakłaźe wopśimjeśa póla zasajźujo. Toś ten pśikład se pomina, až žrědło adresowych datow jo z LibreOffice zregistrěrowane.

1. Wubjeŕśo Zasajźiś – Pólo – Dalšne póla… a klikniśo pón na rejtarik Datowa banka.

2. Klikniśo w lisćinje Typ na „Póla serijowego śišća“.

3. Klikniśo w pólu Wuběrk datoweje banki dwójcy na adresnik, klikniśo pón na „Pśedmě“ a pón na Zasajźiś. Wóspjetujśo to za „Familijowe mě“.

4. Stajśo w dokumenśe kursor mjazy dwě póli, tłocćo proznu tastu a wrośćo se k dialogoju Póla:

5. Klikniśo na rejtarik Funkcije a pón na „Wuměnity tekst“ w lisćinje Typ.

6. Zapódajśo „Adresnik.adrese.pśedmě“ do póla Wuměnjenje.

7. Zapódajśo prozne znamje do póla Pón a wóstajśo pólo Abo prozne.

Móžośo něnto wuměnjenje wužywaś, aby tekst zasajźił, kótaryž na wopśimjeśu póla Pśedmě bazěrujo.

1. Klikniśo w dialogu Póla na rejtarik Funkcije.

2. Klikniśo w pólu Typ na „Wuměnity tekst“.

3. Zapódajśo Adresnik.adrese.pśedmě == "Michał" do póla Wuměnjenje.

4. Zapódajśo "Luby" do póla Pón.

5. Zapódajśo "Witaj" do póla Howac.

6. Klikniśo na Zasajźiś.