Datowa banka

Móžośo póla z někakeje datoweje banki do swójogo dokumenta zasajźiś, na pśikład adresowe póla.

Pśistup k toś tomu pśikazoju …

Wubjeŕśo Zasajźiś – Pólo – Dalšne póla… – Rejtarik: Datowa banka

Typ

Nalicyjo pólne typy, kótarež su k dispoziciji.

Pólny typ	Wóznam
Někaka datowa sajźba	Zasajźujo wopśimjeśe póla datoweje banki, kótarež w pólu Numer datoweje sajźby ako pólo serijowego śišća pódawaśo, jolic Wuměnjenje, kótarež zapódawaśo, jo docynjone. Jano datowe sajźby, kótarež su w naglěźe datowego žrědła ze wšakorakim wuběrkom wubrane, se zapśimuju. Móžośo toś to pólo wužywaś, aby někotare datowe sajźby do dokumenta zasajźił. Zasajźćo jadnorje pólo Někaka datowa sajźba pśed pólami serijowego lista, kótarež wěstu datowu sajźbu wužywaju.
Mě datoweje banki	Zasajźujo mě tabele datoweje banki, kótaraž jo w pólu Wuběrk datoweje banki wubrana. Pólo „Mě datoweje banki“ jo globalne pólo, to groni, jolic druge mě datoweje banki do swójogo dokumenta zasajźujośo, se wopśimjeśe wšych do togo póla „Mě datoweje banki“ aktualizěrujo.
Pólo serijowego lista	Zasajźujo mě póla datoweje banki ako zastupujucy tekst, aby dokument serijowego śišća napóraś mógał. Pólne wopśimjeśe se awtomatiski zasajźijo, gaž serijowy list śišćiśo.
Pśiduca datowa sajźba	Zasajźujo wopśimjeśe pśiducego póla serijowego śišća do wašogo dokumenta, jolic wuměnjenje, kótarež sćo definěrował, jo docynjone. Datowe sajźby, kótarež cośo zapśimjeś, muse w naglěźe datowego žrědła wubrane byś. Móžośo pólo „Pśiduca datowa sajźba“ wužywaś, aby wopśimjeśe na se slědujucych datowych sajźbow mjazy pólami serijowego śišća w dokumenśe zasajźił.
Numer datoweje sajźby	Zasajźujo numer wubraneje datoweje sajźby datoweje banki.

Slědujuce póla daju se jano zasajźiś, jolic wótpowědny pólny typ jo w lisćinje Typ wubrany.

Wuběrk datoweje banki

Wubjeŕśo tabelu datoweje banki abo wótpšašowanje datoweje banki, na kótarejž se ma pólo póśěgowaś. Móžośo póla z někotarych datowych bankow abo wótpšašowanjow do dokumenta zapśimjeś.

Wuměnjenje

Zapódajśo how kriterije za póla, kótarež su z wuměnjenim zwězane.

Jolic cośo, móžośo wuměnjenje pśipokazaś, kótarež musy docynjone byś, nježli až se póli „Někaka datowa sajźba“ a „Pśiduca sajźba“ zasajźujotej. Standardne wuměnjenje jo „True“, to groni, wuměnjenje jo pśecej wěrne, jolic tekst wuměnjenja njezměnjaśo.

Numer datoweje sajźby

Zapódajśo numer datoweje sajźby, kótaruž cośo zasajźiś, gaž pódane wuměnjenje jo docynjone. Numer datoweje sajźby aktualnemu wuběrkoju w naglěźe datowego žrědła wótpowědujo. Jolic na pśikład slědne 5 datowych sajźbow w datowej bance wuběraśo, kótaraž 10 datowych sajźbow wopśimujo, buźo numer prědneje datoweje sajźby 1, nic 6.

Jolic se na póla w rozdźělnej datowej bance (abo w drugej tabeli abo w drugem wótpšašowanju w samskej datowej bance) póśěgujośo, LibreOffice numer datoweje sajźby relatiwnje k aktualnemu wuběrkoju póstaja.

Format

Wubjeŕśo format póla, kótarež cośo zasajźiś. Toś to nastajenje jo za numeriske, logiske, datumowe a casowe póla k dispoziciji.

Z datoweje banki

Wužywa format, kótaryž jo we wubranej datowej bance definěrowany.

Pśepytaś

Wócynja dialog Wócyniś, źož móžośo dataju datoweje banki (*.odb) wubraś. Wubrana dataja se lisćinje za wuběrk datowych bankow pśidajo.

Swójski

Nałožujo format, kótaryž w lisćinje swójskich formatow wuběraśo.

Lisćina swójskich formatow

Nalicyjo k dispoziciji stojece swójske formaty.

Serijowy list śišćaś

Gaž dokument śišćiśo, kótaryž póla datoweje banki wopśimujo, se dialog was pšaša, lěc cośo serijowy list śišćaś. Jolic z „Jo“ wótegranjaśo, se dialog Serijowy śišć wócynja, źož móžośo datowe sajźby datoweje banki wubraś, kótarež cośo śišćaś.