Formula

Definěrujo nastajenja formuloweje syntakse a pśi zacytowanju nastajenjow za LibreOffice Calc.

Nastajenja formulow

Formulowa syntaksa

Dajo tśi móžnosći. Pśikład: W pśikładowem tabelowem dokumenśe stej dwě źěłowej tabeli, Tabela1 a Tabela2. W celi A1 tabele Tabela1 jo póśěg k celi C4 tabele Tabela2.

• Calc A1 – To jo standard LibreOffice Calc. Póśěg buźo =$Tabela2.C4

• Excel A1 – To jo standard Microsoft Excel. Póśěg buźo =Tabela2!C4

• Excel R1C1. To jo relatiwna smužkowa/słupowa adresa kaž jo znata z Microsoft Excel. Póśěg buźo =Tabela2!R[3]C[2]

Engelske mjenja funkcijow wužywaś

W LibreOffice Calc daju se funkciske mjenja pśełožyś. Pó standarźe kontrolny kašćik njejo markěrowany, což groni, až se pśełožone funkciske mjenja wužywaju. Gaž se toś ten kontrolny kašćik markěrujo, se město togo engelske funkciske mjenja wužywaju. To se na wšykne slědujucych wobceŕkow wustatkujo: formulowe zapódaśe a pokazanje, funkciski asistent a formulowe pokaze. Móžośo zawěsće jen znjemóžniś, aby se k pśełožonym mjenjam funkcijow wrośił.

Źěleńske znamuška

Z toś teju kupku opciskich tłocaškow móžośo źěleńske znamuška w swójich formulowych wurazach konfigurěrowaś. To jo na pśikład praktiske, gaž cośo swóje funkciske parametry pśez komy (,) město semikolonow (;) wótźěliś.

Móžośo na pśikład město =SUMA(A1;B1;C1) =SUMA(A1,B1,C1) zapódaś.

Tejerownosći móžośo teke słupowe a smužkowe źěleńske znamuška za pólne wariable inline změniś. Do togo jo pólna wariabla inline semikolony (;) ako słupowe źěleńske znamuško a padorownu ceru (|) ako smužkowe źěleńske znamuško wužywała; typiski wuraz pólneje wariable inline ako toś ten by za pólnu wariablu 5 x 2 tak wuglědała:

={1;2;3;4;5|6;7;8;9;10}

Gaž słupowe źěleńske znamuško do komy (,) změnijośo a smužkowe źěleńske znamuško do semikolona (;) buźo ten samski wuraz tak wuglědaś:

={1,2,3,4,5;6,7,8,9,10}

Znowegowoblicenje pśi zacytanju dataje

Znowegowoblicenje formulow móžo bejny cas traś, gaž wjelgin wjelike dataje zacytajośo.

Excel 2007 a nowšy:

Zacytanje wjelikeje dateje tabelowego dokumenta móžo dłujko traś. Jolic njetrjebaśo daty swójogo wjelikego tabelowego dokumenta ned aktualizěrowaś, móžośo znowegowoblicenje až do lěpšego casoweho dypka wótstarcyś. LibreOffice wam zmóžnja, znowegowoblicenje tabelowych dokumentow Excel 2007 (a nowšego) wótstarcyś, aby se cas zacytanja póspěšył.

Tabelowy dokument ODF (z LibreOffice njeskłaźony):

LibreOffice wuslědki formulow tabelowych dokumentow do swójeje ODF-dataje pufrujo. Toś ta funkcija LibreOffice pomaga, wjeliki tabelowy dokument ODF, kótaryž jo se składł pśez LibreOffice, malsnjej znowego woblicyś.

Za tabelowe dokumenty ODF, kótarež su se składli pśez druge programy a źož take mjazywótkłaźone formulowe wuslědki njeeksistěruju, dajo se znowegowoblicenje wótstarcyś, aby se zacytanje dataje z datajami Excel 2007 póspěšyło.

Za zapiski górjejce su slědujuce wuběrki móžne:

• Nigda znowego njewulicyś – Formule se pśi zacytanju dataje znowego njewulicuju.

• Pśecej znowego wulicyś – Wšykne formule se pśi zacytanju dataje znowego wulicuju.

• Wužywarja se pšašaś – Wužywarja se za akciju pšašaś.

Optimalna smužkowa wusokosć

Za wjelike tabelowe dokumenty wulicenje optimalneje smužkoweje wusokosći wót formatěrowanja celowego wopśimjeśa a teke wót wuslědka formulow z wuměnjonymi formatami wótwisujo.

• Nigda znowego njewulicyś – Smužkowa wusokosć se pśi zacytanju dataje znowego njewulicujo.

• Pśecej znowego wulicyś – Ceła smužkowa wusokosć se pśi zacytanju dataje znowego wulicujo.

• Wužywarja se pšašaś – Wužywarja se za akciju pšašaś.