Dokumenty z OpenPGP koděrowaś

LibreOffice móžo dokumenty z pomocu kryptografije zjawnego kluca OpenPGP koděrowaś. Dokument se z algoritmusom symetriskego skoděrowanja koděrujo.

Signěrowanje z GPG jano za dokumenty ODF funkcioněrujo.

Pśistup k toś tomu pśikazoju …

Wubjeŕśo meni Dataja – Składowaś ako… a pón Z klucom GPG koděrowaś a klikniśo na Składowaś.

LibreOffice móžo dokumenty z pomocu OpenPGP dowěrliwje koděrowaś. Dokument se ze symetriskim skoděrowańskim algoritmusom koděrujo, kótaryž se symetriski kluc pomina. Kuždy symetriski kluc se jano jaden raz wužywa a groni se teke pósejźeński kluc. Dokument a jogo pósejźeński kluc se dostawarjeju sćelotej. Pósejźeński kluc musy se dostawarjam słaś, aby wěźeli, kak mógu dokument dešifrěrowaś, ale, aby se za pśenosowanje šćitał, koděrujo se ze zjawnym klucom dostawarja. Jano priwatny kluc dostawarja móžo pósejźeński kluc dešifrěrowaś.

LibreOffice software OpenPGP wužywa, kótaraž jo na wašom licadle instalěrowana. Jolic software OpenPGP njejo k dispoziciji, musyśo pśigódnu za swój źěłowy system ześěgnuś, nejskerjej z wobchoda nałoženjow abo rozdźěleńskego kanala za software.

How su někotare eksterne GPG-nałoženja, wó kótarychž jo znate, až z LibreOffice funkcioněruju:

gpg4win na Windows
GPG Suite na macOS
Na Linux su zwětšego južo instalěrowane:

gnupg – rěd pśikazoweje smužki za signěrowanje, skoděrowanje a zastojanje klucow.

Grafiske nałoženja za gnupg ako na pśikład Seahorse (gnome), Kleopatra a KGpg (KDE).

gpgme – programowe zwězowańske městno nałoženja (API) za wuwijanje nałoženjow z GPG.

Musyśo wósobinski pór kryptografiskich klucow z nałoženim OpenPGP definěrowaś. Slědujśo instrukcijam instalěrowaneje software OpenPGP, aby pór klucow napórał, jo zwětšego prědny kšac, kótaryž musyśo pó instalaciji software wuwjasć.

Konfiguracija skoděrowanja LibreOffice

Póstajśo preferěrowany zjawny kluc za koděrowanje OpenPGP a digitalnu signaturu. Toś te preferěrowane kluce se kuždy raz, gaž dokument signěrujośo abo koděrujośo, we wuběrańskem dialogu awtomatiski wuběraju, až njeby wy je trjebał wubraś, gaž z wěstym klucom cesto signěrujośo.

Wubjeŕśo meni – Wužywaŕske daty. We wobceŕku Kryptografija:

Pódpisowy kluc OpenPGP

Wubjeŕśo swój OpenPGP-kluc z wuběrańskeje lisćiny, aby ODF-dokumenty signěrował.

OpenPGP-kluc za koděrowanje

Wubjeŕśo swój OpenPGP-kluc z wuběrańskeje lisćiny, aby ODF-dokumenty koděrował.

Gaž se dokumenty koděruju, pśecej ze swójskim klucom

Markěrujśo toś ten kontrolny kašćik, aby dataju teke ze swójim klucom koděrował, aby mógał dokument ze swójim priwatnym klucom wócynił.

Wóstajśo toś to nastajenje wubrane, jolic cośo dokumenty dešifrěrowaś, kótarež sćo skoděrował za druge wósoby.

Dokumenty koděrowaś

Koděrowanje OpenPGP se wužywanje zjawnego kluca dostawarja pomina a toś ten kluc musy w klucowem rjeśazu OpePGP k dispozici byś, kótaryž jo na wašom licadle skłaźony. Aby dokument koděrował:

Wubjeŕśo Dataja – Składowaś ako….
Zapódajśo mě za dataju.
Markěrujśo kontrolny kašćik Z GPG-klucom koděrowaś.
Klikniśo na Składowaś. LibreOffice dialog za wuběranje zjawnego kluca OpenPGP wócynja.
Wubjeŕśo zjawny kluc dostawarja. Móžośo někotare kluce naraz wubraś.
Klikniśo na W pórěźe, aby dialog zacynił a dataju składował.

Dataja se z wubranymi zjawnymi klucami skoděrowana składujo.

Jano priwatny kluc dostawarja móžo dokument dešifrěrowaś, snaźkuli koděrujośo teke sam.

Dokumenty dešifrěrowaś

Móžośo jano dokumenty dešifrěrowaś, kótarež su z wašym zjawnym klucom skoděrowane. Aby dokument dešifrěrował:

Wócyńśo dokument. Napominanje za zapódaśe gronidła se zjawijo.
Zapódajśo gronidło priwatnego kluca OpenPGP. Dokument se dešifrěrujo a wopśimjeśe jo k dispoziciji.

Rozdźěl mjazy dokumentowym skoděrowanim z OpenPGP a składowanim z gronidłom

Wobej pśikaza zaběratej se z dowěrliwosću, ale na rozdźělny nałog.

Jolic dokument z gronidłom składujośo, musyśo se gronidło spomnjeś, kótarež sćo zapódał, aby dokument pózdźej wócynił. Kuždy drugi, kótaryž musy dokument wócyniś, musy teke gronidło wěźeś, kótarež jo se wužyło za składowanje. Togodla musy se składowańske gronidło pśenosowaś, aby jo druge wužywarje wěźeli.

Dataje, kótarež su se skoděrowali ze składowańskim gronidłom, njedaju se dešifrěrowaś, snaźkuli składowańske gronidło se zapódawa.

Ze skoděrowanim OpenPGP za dokumenty definěrujośo kupku wužywarjow, kótarež mógu dokument dešifrěrowaś a njetrjebaśo gronidła pó kanalach słaś, kótarychž wěstota njejo znata. Mimo togo nałoženje OpenPGP klucowy rjeśaz zjawnych klucow eficientnjej zastoj.

Wó digitalnych signaturach

OpenPGP we Wikipediji (nimski)