Pśedłogi w zastojniku pśedłogow

Dopórucona metoda za źěłanje z pśedłogami jo wužywanje zastojnika pśedłogow a pśikazow w pódmeniju Dataja – Pśedłogi, Pśedłogu wobźěłaś a Ako pśedłohu składowaś. Toś te pśikaze za zakładne zastojanje pśedłogow w LibreOffice dosegaju.

Toś ta pśirucna wujasnjujo, kak datajowy system ze zastojnikom pśedłogow interagěrujo. Toś te informacije su wósebnje wužytne, jolic cośo zapise direktnje zastojaś, ale se hyšći ze zastojnikom pśedłogow koordiněruju.

Z datajami dokumentowych pśedłogow źěłaś

Zastojnik pśedłogow dataje pśedłogow na jich datajowej kóńcowce spóznawa. Slědujuce datajowe kóńcowki se spóznawaju:

Nałoženje	Rozšyrjenja
Writer	.ott .otm .oth .stw .dot .dotx
Calc	.ots .stc .xlt .xltm .xltx
Impress	.otp .pot .potm .potx .sti
Draw	.otg .std

Za informacije wó woznamje datajowych kóńcowkow glejśo Filter za pśetwórjenje.

Z mjenjami pśedłogow źěłaś

Zastojnik pśedłogow titelowe pólo dokumenta ako mě pśedłogi pokazujo. Tak dłujko ako titelowe pólo njejo prozne, datajowe mě njama wustatkowanja na mě pśedłogi, kótarež se w zastojniku pśedłogow pokazujo. Jolic titelowe pólo jo prozne, se datajowe mě, bźez datajoweje kóńcowki, ako mě pśedłogi pokazujo.

Titele mjazy wjeliko- a małopisanim rozeznawaju. Jolic na pśikład jadna pśedłoga w kategoriji Móje pśedłogi ma titel a4 a druga ma titel A4, se wobej pśedłoze w zastojniku pśedłogow zjawijotej. Jolic wobej pśedłoze ma titel A4, se jano jadna zjawijo.

Jolic pśedłogi samski titel maju, ale k rozdźělnym kategorijam słušaju, se wšykne w zastakniku pśedłogow zjawiju. Jolic na pśikład tśi pśedłogi titel A4 maju a kužda pśedłoga k drugej kategoriji słuša, se wšykne tśi kategorije z mjenim pśedłogi A4 zjawiju.

Aby pólo Titel wobźěłał, wubjeŕśo Dataja – Kakosći… – rejtarik: Wopisanje. Jolic pólo Titel změnjaśo, se nowy titel teke ako mě pśedłogi w zastojniku pśedłogow zjawijo. Abo, jolic pśikaz Pśemjenjowaś w kontekstowem meniju wužywaśo, se pólo Titel pśedłogi do mjenja pśedłogi změnijo.

Jolic dialog Dataja – Ako pśedłogu składowaś se do toś togo dialoga zapódane mě ako datajowe mě wužywa a do póla Titel zapódawa. Jolic datajowe mě pózdźej změnijośo, se pśedłoga hyšći w zastojniku pśedłogow pó zapisku w pólu Titel zjawijo.

Wóźiś, kótare dataje se w zastojniku pśedłogow zjawiju

Zastojnik pśedłogow pśedłogi pokazujo, kótarež su w zapisach, kótarež su w dialogu Sćažki za pśedłogi definěrowane. Aby dialog namakał, wubjeŕśo – LibreOffice – Sćažki a pón Pśedłogi a klikniśo na Wobźěłaś.

Nutśikowne sćažki

Zapise nutśikownych sćažkow njedaju se změniś. Identificěruju městno pśeddefiněrowanych pśedłogow. Toś te pśedłogi se pśecej w zastojniku pśedłogow pokazuju.

Wužywaŕske sćažki

Standardne nastajenje za wužywaŕsku sćažku jo pódzapis template we wužywaŕskem profilowem zapisu. Městno zapisa {wužywaŕski_profil} se póstaja, gaž se LibreOffice instalěrujo. Glejśo wótrězk Standardne městno we wikiboku wó wužywaŕskem profilu LibreOffice za dalšne informacije wó typiskich městnach wužywaŕskego profila w rozdźělnych źěłowych systemach.

Pśedłogi w zapisach, kótarež su we wužywaŕskej sćažce a jeje pódzapisach pódane, se w zastojniku pśedłogow pokazuju. Pódzapise w pódzapisach se njespóznawaju.

Móžośo wužywaŕskej sćažce pśidatne zapise pśidaś. Musy nanejmjenjej jaden zapis we wužywaŕskej sćažce byś, ale njedajo wobgranicowanja, źož zapis jo.

Jolic maśo wěcej ako jaden zapis we wužywaŕskej sćažce, musyśo wubraś, kótary zapis ma se wužywaś, aby se dokument ako pśedłoga składujo, gaž se Dataja – Ako pśedłogu składowaś… wužywa.

Tłocašk Standard wužywaŕsku sćažku na zachopne nastajenje slědk staja, gaž LibreOffice jo se instalěrował.

Z kategorijami źěłaś

Mjenja pódzapisow w swójskich zapisach se ako mjenja kategorijow w zastojniku pśedłogow zjawiju. Jolic kategoriju pśemjenjujośo, se pódzapis dalej wužywa a składujo se z nowym mjenim kategorije w groupuinames.xml we wubranej standardnej sćažce.

Gaž se kategorija wuběra, se wšykne pśedłogi w tom pódzapisu w zastojniku pśedłogow pokazuju, jolic Wšykne nałoženja jo wuběrk za Filter.

Kategorija móžo pśedłogi jano w swójom pódzapisu pokazaś, z dwěma wuwześoma.

• Wšykne kategorije wšykne pśedłogi pokazujo, relatiwnje k wuběrkoju Filter.

• Móje pśedłogi wšykne pśedłogi w zapisach pokazujo, kótarež su we wužywaŕskej sćažce pódane, relatiwnje k wuběrkoju Filter.

Kategorije w kategoriji njejsu móžne, dokulaž pódzapise w pódzapisach se njespóznawaju.

Móžośo kategorije jano w standardnej sćažce pśemjenjowaś a lašowaś, kótaraž jo w dialogu Sćažki wobźěłaś wubrana.