Dokument z WebDAV pśez HTTPS wócyniś

W LibreOffice móžośo dokumenty wócyniś a składowaś, kótarež su na serwerje WebDAV skłaźone, kótaryž wěsty protokol HTTPS wužywa.

Musyśo datajowe dialogi LibreOffice wužywaś, aby WebDAV pśez HTTPS wužywał.

1. Wubjeŕśo LibreOffice – Powšykne. Zawěsććo, až nastajenje Dialogi LibreOffice wužywaś jo zmóžnjone. Klikniśo na W pórěźe, aby dialogowe pólo zacynił.

2. Wubjeŕśo Dataja – Wócyniś….

3. Zapódajśo do póla Datajowe mě sćažku k zarědnikoju WebDAV. Zapódajśo na pśikład https://192.168.1.1/webzarědnik, aby wěsty zwisk ze serwerom WebDAV na IP-adresy 192.168.1.1 wócynił, a aby wopśimjeśe zarědnika webzarědnik nalicyju.

4. Prědny raz, gaž ze serwerom WebDAV zwězujośo, wiźiśo dialog Websedło jo se certificěrowało pśez njeznatu awtoritu.

   Klikniśo na tłocašk Certifikat pśepytowaś a pśeglědujśo certifikat.

   Jolic certifikat akceptěrujośo, wubjeŕśo Toś ten certifikat nachylu za toś to pósejźenje akceptěrowaś a klikniśo na W pórěźe. Móžośo dataje bźez dalšnych pšašanjow ze serwera WebDAV wócyniś a składowaś, daniž LibreOffice njekóńcyśo.

   Jolic certifikatoju njedowěrjaśo, klikniśo na Pśetergnuś.

5. Jolic sćo akceptěrował certifikat, móžośo něnto datajowe mě abo datajowe mjenja wubraś, kótarež cośo wócyniś a pón na Wócyniś kliknuś.

Jolic se w certifikaśe pódane mě domeny a mě domeny, kótarež sćo zapódał w dialogu Dataja, njerownatej, wiźiśo dialog, kótaryž wam zmóžnja, jadno ze slědujucych nastajenjow wubraś:

Certifikat pokazaś – Wócynja dialog Certifikat pokazaś.

Dalej – Jolic sćo se wěsty, až wobej domenje stej jadnakej, klikniśo na tłocašk Dalej.

Zwisk pśetergnuś – Pśetergnjo zwisk.

Jolic na Dalej klikaśo, móžośo dialog wiźeś, kótaryž was pšosy, wašo wužywaŕske me a gronidło zapódaś.