Wó digitalnych signaturach
W LibreOffice móžośo swóje dokumenty a makra digitalnje signěrowaś.
Certifikaty
Aby dokument digitalnje signěrował, trjebaśo wósobinski kluc, certifikat. Wósobinski kluc se na wašom licadle ako kombinacija priwatnego kluca składujo, kótaryž musy se zatajiś, a zjawny kluc, kótaryž swójim dokumentam pśidawaśo, gaž je signěrujośo.
Dokument składowaś a signěrowaś
Gaž digitalnu signaturu na dokument nałožujośo, se typ kontrolnego suma z wopśimjeśa dokumenta a wašogo wósobinskego kluca woblicyjo. Kontrolna suma a waš zjawny kluc se gromaźe z dokumentom składujotej.
Signěrowany dokument wócyniś
Gaž něchten dokumenta na někakem licadle z nejnowšeju wersiju LibreOffice wócynja, program kontrolnu sumu znowego woblicyjo a ju ze skłaźoneju kontrolneju sumu pśirownujo. Jolic wobej stej jadnakej, program signalizěrujo, až originalny, njezměnjony dokument wiźiśo. Mimo togo móžo program wam informacije wó zjawnem klucu z certifikata pokazaś.
Móžośo zjawny kluc ze zjawnym klucom pśirownaś, kótaryž jo na websedle certificěrowańskego městna wózjawjony.
Gažkuli něchten něco w dokumenśe změnja, toś ta změna digitalnu signaturu kśiwi. Pó změnje se pokazany dokument wěcej ako originalny dokument njewóznamjenjujo.
Wuslědk pśeglědowanja signatury se w statusowej rědce a w dialogu Digitalna signatura pokažo. Někotare dokumenty a makrowe signatury mógu w dokumenśe ODF wopśimjone byś. Jolic dajo problem z jadneju signaturu, pón se z togo wuchada, až wuslědk pśeglědanja toś teje jadneje signatury za wšykne signatury płaśi. To groni, jolic dajo źaseś płaśiwych signaturow a jadnu njepłaśiwu signaturu, pón statusowa rědka a statusowe pólo w dialogu signaturu ako njepłaśiwu wóznamjenjujotej.
Móžiśo jaden ze slědujucych symbolow a powěsćow wiźeś, gaž signěrowany dokument wócynjaśo.
|
Symbol w statusowej rědce |
Status signatury |
|---|---|
|
|
Signatura jo płaśiwa. |
|
|
Signatura jo w pórěźe, ale certifikaty njejsu se dali pśeglědowaś. Signatura a certifikat stej w pórěźe, ale nic wšykne źěle dokumenta su signěrowane. (Za dokumenty, kótarež su se signěrowali ze starymi wersijami software, glejśo pokazku dołojce.) |
|
|
Signatura jo njepłaśiwa. |
Signatury a wersije software
Signěrowanje wopśimjeśa jo se změniło z OpenOffice.org 3.2 a StarOffice 9.2. Něnto se wšykne wopśimjeśa datajow, mimo dataje signatury sameje (META-INF(documentsignatures.xml), signěruju.
Gaž dokument z OpenOffice.org 3.2 abo StarOffice 9.2 abo z póznjejšu wersiju signěrujośo, a ten dokument w staršej wersiji software wócynjaśo, se signatura ako „njepłaśiwa“ pokazujo. Signatury, kótarež su se napórali ze staršymi wersijami software, se z tekstom „jano źěle dokumenta su signěrowane“ markěruju, gaž se do nowšeje software zacytaju.
Gaž dokument OOXML signěrujośo, se signatura pón pśecej z tekstom „jano źěle dokumenta su signěrowane“ markěruju. Metadaty datajow OOXML se nigda njesigněruju, aby kompatibelne z Microsoft Office byli.
Gaž dokument PDF signěrujośo, se toś to markěrowanje njewužywa. Gaž jano źěle dokumenta signěrujośo, njepłaśiwa signatura nastawa.
Signěrowanje drugich dokumentowych formatow se tuchylu njepódpěra.
Gaž dokument ODF zacytujośo, wiźiśo snaź symbol w statusowej rědce a statusowe pólo w dialogu, kótarež pódawa, až dokument jo jano pó źělach signěrowany. Toś ten status se zjawijo, gaž signatura a certifikat stej płaśiwej, ale stej se napórałej ze staršeju wersiju OpenOffice.org až 3.2 abo ze staršeju wersiju StarOffice až 9.2. We wersijach OpenOffice.org a StarOffice, kótarež su starše ako wersija 3.0 resp. 9.0 so signatura dokumenta jano na głowne wopśimjeśe, wobraze a zasajźone objekty nałožujo a młoge wopśimjeśe, ako makra, njejsu se signěrowali. W OpenOffice.org 3.0 a Staroffice 9.0 jo se signatura dokumenta na nejwěcej wopśimjeśa nałožyła, teke makra. Typ MIME pak a wopśimjeśe zarědnika META-INF njejstej se signěrowałej. A w OpenOffice.org 3.2, StarOffice 9.2 a we wšych wersijach LibreOffice se wšykno wopśimjeśe, mimo dataje signatury sameje (META-INF/documentsignatures.xml) signěrujo.
Wěstotne warnowanja
Gaž signěrowany dokument dostawaśo, a software k wěsći dajo, až signatura jo płaśiwa, to njegroni, až móžośo absolutnje wěsty byś, až dokument jo ten samski, kótaryž jo wótpósłaŕ pósłał. Signěrowanje dokumenty z certifikatami software njejo dopołnje wěsta metoda. Dajo wjele móžnosćow, z kótarymiž daju se wěstotnych funkcijow wobinuś.
Pśikład: Pśedstajśo se někogo, kenž se wugranja, až jo wótpósłaŕ wašeje banki. Móžo z falšnym mjenim lažko certifikat dostaś, wam signěrowanu mejlku słaś, z twarźenim, až za wašu banku źěła. Dostanjośo mejlku a mejlka abo dokument w njej ma „płaśiwy signěrowany“ symbol.
Njedowěŕśo symboloju. Pśeglědajśo certifikaty.
Płaśiwosć signatury njejo pšawniski zawězujuca garantija.
Na źěłowych systemach Windows se funkcije Windows za pśeglědowanje signatury wužywaju. Na systemach Solaris a Linux se dataje wužywaju, kótarež se pśez Thunderbird, Mozilla abo Firefox k dispoziciji stajaju. Musyśo zawěsćiś, až dataje, kótarež se we wašom systemje wužywaju, napšawdu dataje su, kótarež spócetne wuwijarje k dispoziciji stajaju. Za złosne zadobywarje dajo wjele móžnosćow, z kótarymiž mógu originalne dataje ze swójskimi datajami wuměniś.
Powěźeńki wó płaśiwosći signatury, kótarež w LibreOffice wiźiśo, su powěźeńki, kótarež pśeglědowańske dataje wrośaju. Software LibreOffice njama móžnosć zawěsćiś, až powěźeńki napšawdny status certifikata wótbłyšćuju. Software LibreOffice jano powěźeńki pokazujo, kótarež druge dataje k wěsći daju, kótarež njejsu pód kontrolu LibreOffice. Njedajo žeden pšawniski zawězk LibreOffice, až pokazane powěźeńki napšawdnu status digitalneje signatury wótbłyšćuju.