Dataje na zdalonych serwerach wócyniś a składowaś

Wužywaŕska pśirucka za zdalone dataje

LibreOffice móžo dataje na zdalonych serwerach wócyniś a składowaś. Gaž se dataje na zdalonych serwerach źarže, móžośo z dokumentami na rozdźělnych licadłach źěłaś. Móžośo na pśikład na dokumenśe w běrowje wob źeń źěłaś a jen doma za změny w slědnej minuśe wobźěłaś. Składowanje datajow na zdalonym serwerje pśed zgubjenim licadła abo defektom twardeje platy šćita. Někotare serwery mógu teke dataje zarědowaś a wurědowaś, pótakem jich wužyśe a pśistup kontrolěrowaś.

LibreOffice wjele dokumentowych serwerow pódpěra, kótarež derje znate seśowe protokole ako na pśikład WebDAV, pśipušćenje Windows a SSH wužywaju. Pódpěra teke woblubowane słužby ako Google Drive, komercielne serwery a serwery wótwórjonego žrědła, kótarež standard OASIS CMIS implementěruju.

Aby ze słužbu za zdalone dataje źěłał, musyśo nejpjerwjej zwisk za zdalone dataje konfigurěrowaś.

Dataju w słužbje za zdalone dataje wócyniś

Pśewjeźćo jaden ze slědujucych kšacow:

Wubjeŕśo Dataja – Ze serwera wócyniś… w modulu LibreOffice
Klikniśo na tłocašk Zdalone dataje w startowem centrumje

Dialog Zdalone dataje se zjawijo.

Wubjeŕśo dataju a klikniśo na Wócyniś abo tłocćo Enter.

Dialog Zdalone dataje, kótaryž se pón zjawijo, ma wjele źělow. Górne lisćinowe pólo lisćinu zdalonych serwerow wopśimujo, kótarež sćo definěrował do togo. Smužka pód lisćinowym pólom sćažku za pśistup k zarědnikoju pokazujo. Nalěwo jo zarědnikowa struktura wužywaŕskego ruma na serwerje. Głowny wobceŕk dataje w zdalonem zarědniku pokazujo.

Dataje wurědowaś a zarědowaś

Akciji Wurědowaś a Zarědowaś aktualizacije na dokumenśe wóźitej a zajźujotej njewitanemu pśepisanjeju w zdalonej słužbje CMIS.

Zastajenje dokumenta jen wurědujo, což drugim wužywarjam zawoborujo, jen změniś. Jano jaden wužywaŕ móžo wěsty dokument kuždy cas wurědowany (zastajony) měś. Gaž se dokument zarědujo abo se wurědowanje wótpórajo, se dokument wótwórja.

Za zdalone dataje w pśipušćenjach Windows, WebDAV a słužbach SSH njedajo wóźenja zarědowanja a wurědowanja.

Gaž se dataja ze słužby CMIS za zdalone dataje wócynja, LibreOffice tłocašk Wurědowaś górjejce we wobceŕku powěsći pokazujo. Klikniśo na tłocašk Wurědowaś, aby dataju na serwerje zastajił, aby wobźěłanjeju pśez drugego wužywarja zajźował. Abo wubjeŕśo Dataja – Wurědowaś.

LibreOffice źěłowu kopiju dataje na serwerje napórajo (a zasajźujo znamjenjowy rjeśazk (źěłowa kopija) w datajowem mjenju), gaž se dataja wurědujo. Kužda wobźěłańska a składowańska operacija se w źěłowej kopiji stawa. Móžośo swóju dataju tak cesto ako cośo składowaś. Gaž sćo dokóńcył změny, zarědujśo dataju.

Aby dataju zarědował, wubjeŕśo Dataja – Zarědowaś…. Dialog se wócynja, w kótaremž móžośo komentary wó slědnych změnach zasajźiś. Toś te komentary se na serwerje CMIS za wersijowu kontrolu składuju. Źěłowa kopija eksistěrujucu dataju narownajo a jeje wersijowy numer se aktualizěrujo.

Aby wurědowanje wótpórał, wubjeŕśo Dataja – Wurědowanje wótpóraś…. Warnowańska powěźeńka buźo informěrowaś, až se slědne změny zachyśiju. Jolic to wobkšuśijośo, se wersijowe aktualizacije njepśewjedu.

Njezabydniśo dataju zarědowaś, gaž ju wěcej njewužywaśo. Jolic to njecyniśo, se dataja zastajijo a drugi wužywaŕ njesmějo ju změniś.

Dataju na zdalonu serwerje składowaś

Pśewjeźćo jaden ze slědujucych kšacow

Jolic se dataja ze serwera CMIS wócynja, wubjeŕśo Dataja – Składowaś, klikniśo pón na tłocašk Składowaś abo tłocćo Strg+S.
Jolic se dataja na serwerje CMIS njeskładujo, wubjeŕśo Dataja – Dataju na serwerje składowaś… abo klikniśo dłujko na symbol Składowaś a wubjeŕśo Dataju na serwerje składowaś….

Dialog Zdalone dataje se zjawijo. Wubjeŕśo serwer za zdalone dataje.

Wubjeŕśo w lisćinowem pólu Filter póžedany format.
Zapódajśo mě do póla Datajowe mě a klikniśo na Składowaś.
Gaž źěło z dataju dokóńcyjośo, zarědujśo ju. Aby to cynił, wubjeŕśo Dataja – Zarědowaś….

Kakosći datajow, kótarež su se składli na serwerach CMIS

Dataje, kótarež su se składli na serwerje CMIS, maju kakosći a metadaty, kótarež njedajo pśi lokalnem składowanju. Toś te metadaty su wažne za wóźenje a pytanje zmólkow zwiska CMIS a serwerowu implementaciju. Wšykne pokazane parametry su pśeśiwo pisanjeju šćitane.

Wubjeŕśo Dataja – Kakosći… – rejtarik: CMIS.

Słužbu za zdalone dataje konfigurěrowaś