Zasajźujo wšykne póla wubraneje datoweje sajźby w aktualnem dokumenśe na poziciji kursora. Symbol jo jano widobny, jolic aktualny dokument jo tekstowy abo tabelowy dokument.
Daty do teksta
Wubjeŕśo we wobglědowaku datowych žrědłow datowu sajźbu, kótaruž cośo do dokumenta zasajźiś a klikniśo pón na symbol Daty do teksta. Datowa sajźba se w dokumenśe na poziciji kursora zasajźijo, wopśimjeśe kuždego póla datoweje sajźby se pón do słupa tabele kopěrujo. Móžośo teke někotare datowe sajźby wubraś a je do dokumenta pśenosowaś, gaž na symbol Daty do teksta klikaśo. Kužda jadnotliwa datowa sajźba se pón do noweje smužki pišo.
Wubjeŕśo we wobglědowaku datowych žrědłow datowe sajźby, kótarež cośo do dokumenta zasajźiś a klikniśo pón na symbol Daty do teksta abo śěgniśo a pušććo daty z wobglědowaka datowych žrědłow do dokumenta. To dialog Słupy datoweje banki zasajźiś wócynijo. Wubjeŕśo, lěc se maju daty ako tabela, ako póla abo ako tekst zasajźiś.
Nastajenja, kótarež sćo póstajił w dialogu Słupy datoweje banki, se składuju a budu aktiwne pśiducy raz, gaž se dialog wócynja. Toś ten składowański proces jo njewótwisny wót datoweje banki a móžo nastajenja za maksimalnje 5 datowych bankow pśiwześ.
Jolic se daty ako tabela do dokumenta zasajźuju, se kakosći tabele gromaźe z datami w dokumenśe njeskładuju. Jolic funkciju Awtomatiski format za formatěrowanje tabele wuběraśo, buźo se LibreOffice mě formatoweje pśedłogi spomnjeś. Toś ta pśedłoga se pón awtomatiski wužywa, jolic daty znowego ako tabelu zasajźujośo, mimo až nastajenja su se změnili.
