Sortěrowanje a zrědowanje

W dialogu Sortěrowanje a zrědowanje rozpšawniskego designera móžośo póla definěrowaś, kótarež se maju we wašej rozpšawje sortěrowaś, a póla, kótarež se maju gromaźe źaržaś, aby kupku twórili. Jolic swóju rozpšawu pó wěstem pólu rědujośo, se wšykne datowe sajźby ze samskeju gódnotu togo póla w jadnej kupce gromaźe źarže.

Pólo Kupki póla w pórěźe wótgórjejka dołoj pokazujo. Móžośo někake pólo wubraś a pón na tłocašk Górjej abo Dołoj kliknuś, aby toś to pólo w lisćinje górjej abo dołoj pśesunuł.

Sortěrowanje a zrědowanje se w pórěźe lisćiny wótgórjejka dołoj nałožujotej.

Pó standarźe se nowa kupka za kuždu změnjonu gódnotu datoweje sajźby wubranego póla napórajo. Móžośo toś tu kakosć wótwisujucy wót pólnego typa změniś:

1. Za póla typa Tekst móžośo prefiksowe znamuška wubraś a licbu znamuškow do tekstowego póla dołojce zapódaś. Datowe sajźby, kótarež su identiske w prědnych n znamuškach, se rěduju.

2. Za póla typa datum/cas móžośo datowe sajźby pó samskem lěśe, kwartalu, mjasecu, tyźenju, dnju resp. pó samskej góźinje abo minuśe zrědowaś. Móžośo mimo togo interwal za tyźenje a góźiny pódaś: 2 tyźenja daty w dwójotyźeńskich kupkach rědujo, 12 góźin daty w połdnjownych kupkach.

3. Za póla typa Awtogódnota, Pjenjeze abo Licba interwal pódawaśo.

Gaž pódawaśo, až se maju někotare datowe sajźby na samskem boku gromaźe źaržaś, maśo tśi móžnosći:

1. Ně – na granice bokow njeźiwaju.

2. Ceła kupka – śišći kupkowu głowowu smužku, wótrězk Drobnostka a kupkowu nogowu smužku na samskem boku.

3. Z prědneju drobnostku – śišći kupkowu głowu na boku, jolic se dajo prědna datowa sajźba drobnostki na samskem boku śišćaś.