Diagramowy typ XY (rozdrosćeński diagram)

Na prědnem boku diagramowego asistenta móžośo diagramowy typ wubraś.

XY (rozdrosćeński diagram)

Jadnory XY-diagram na jadnom datowem rěźe bazěrujo, kótaryž z mjenja, lisćiny X-gódnotow a lisćiny Y-gódnotow wobstoj. Kuždy pór (X|Y) se ako dypk w koordinatowem systemje pokazujo. Mě datowego rěda jo z Y-gódnotami zwězane a se w legenźe pokazujo.

Wubjeŕśo XY-diagram ze slědujucych pśikładowych nadawkow:

1. X-wósku skalěrowaś

2. Parametrowu kśiwanku napóraś, na pśikład špiralu

3. Graf funkcije kresliś

4. statistiske pśirědowanje kwantitatiwnych wariablow zwěsćiś

Waš XY-diagram móžo wěcej ako jaden datowy rěd měś.

Warianty XY-diagramow

Móžośo wariantu XY-diagrama na prědnem boku diagramowego asistenta wubraś, abo wuběraśo Format – Diagramowy typ… za diagram we wobźěłańskem modusu.

Diagram se ze standardnymi nastajenjami napórajo. Za tym až jo diagram napórany, móžośo jogo kakosći wobźěłaś, aby naglěd změnił. Linijowe stile a symbole daju se w rejtariku Linija dialoga kakosćow datowego rěda změniś.

Klikniśo dwójcy na datowy dypk, aby dialog Datowy rěd wócynił. W toś tom dialogu móžośo wjele kakosćow datowego rěda změniś.

Za 2D-diagramy móžośo Zasajźiś – Zmólkowe grědy Y… wubraś, aby zmólkowe grědy pokazał.

Móžośo pśerězkowe a trendowe linije z pomocu pśikazow w meniju Zasajźiś pokazaś.

Jano dypki

Kuždy datowy dypk se pśez symbol pokazujo. LibreOffice standardne symbole z rozdźělnymi formami a barwami za kuždy datowy rěd wužywa. Standardne barwy se w – Diagramy – Standardne barwy nastajaju.

Jano linije

Toś ta warianta rowne linije wót jadnogo datowego dypka do pśiducego kresli. Datowe dypki se pśez symbole njepokazuju.

Kreslański pórěd jo ten samski ako pórěd w datowem rěźe. Markěrujśo Pó X-gódnotach sortěrowaś, aby linije pó pórěźe X-gódnotow kreslił. Toś to sortěrowanje se jano na diagram nałožujo, nic na daty w tabeli.

Dypki a linije

Toś ta warianta dypki a linije rownocasnje pokazujo.

3D-linije

Linije se ako paski pokazuju. Datowe dypki se pśez symbole njepokazuju. Wubjeŕśo w napóranem diagramje 3D-naglěd, aby kakosći ako wobswětlenje a kut wiźenja nastajił.

Linije głaźiś

Wubjeŕśo Kśiwanka z wuběrańskego póla Linijowy typ, aby kśiwanki město rownych linijowych segmentow kreslił.

Klikniśo na Kakosći, aby drobnostki za kśiwanki nastajił.

Kubiski spline waše datowe dypki z polynomami tśeśego stopnja interpolěrujo. Pśechady mjazy polynomowymi źělami su gładke a maju ten samski póstup a tu samsku kśiwulu.

Rozeznaśe póstaja, kak se maju linijowe segmenty woblicyś, aby se źěl polynoma mjazy dwěma datowyma dypkoma kreslił. Móžośo mjazydypki wiźeś, jolic na někaki datowy dypk klikaśo.

B-spline parametrisku, interpolěrujucu kśiwanku B-spline wužywa. Te kśiwanki se kusk pó kusku z polynomow twórje. Stopjeń polynomow stopjeń toś tych polynomow nastaja.

Schójźeńkowe linije

Wubjeŕśo Schójźeńki z wuběrańskego póla Linijowy typ, aby linije kreslił, kótarež wót dypka do dypka póstupuju, město rownych linijowych segmentow.

Klikniśo na Kakosći, aby drobnostki za kśiwanki nastajił.

Dajo 4 rozdźělne schójźeńkowe typy:

• 

  Zachopina se z horicontalneju liniju a póstupujo wertikalnje až do kóńca.

• 

  Póstupujo wertikalnje a kóńcy se z horicontalneju liniju.

• 

  Zachopina se z horicontalneju liniju, póstupujo wertikalnje wesrjejź X-gódnotow a kóńcy se z horicontalneju liniju.

• 

  Zachopina se wertikalnje až do srjejźi Y-gódnotow, pókšacujo se z horicontalneju liniju a kóńcy se wertikalnje na kóńcu.