Trendowe linije

Trendowe linije daju se wšym typam 2D-diagramow mimo krejzowych a grědowych diagramow pśidaś.

1. Aby trendowu liniju za datowy rěd zasajźił, klikniśo nejpjerwjej dwójcy na diagram, aby do wobźěłańskego modusa stupił a wubjeŕśo datowy rěd w diagramje, za kótaryž cośo trendowu liniju napóraś.

2. Wubjeŕśo Zasajźiś – Trendowa linija abo klikniśo z pšaweju tastu na datowy rěd, aby kontekstowy meni wócynił a wubjeŕśo Trendowu liniju zasajźiś.

3. Linije pśerězneje gódnoty su wósebne trendowe linije, kótarež pśerěznu gódnotu pokazuju. Wužywajśo Zasajźiś – Linije pśerězneje gódnoty, aby linije pśerězneje gódnoty za datowe rědy zasajźił.

4. Aby trendowu liniju abo liniju pśerězneje gódnoty wulašował, klikniśo na liniju a tłocćo pón tastu Entf.

Trendowa linija ma samsku barwu ako wótpowědny datowy rěd. Aby linijowe kakosći změnił, wubjeŕśo trendowu liniju a pón Format – Wuběrk formatěrowaś… – Rejtarik: Linija.

Rownica trendoweje linije a koeficient póstajonosći

Gaž diagram jo we wobźěłańskem modusu, LibreOffice wam rownicu trendoweje linije a koeficient póstajonosći R² woblicujo, lěcrownož njeby se pokazałej: Klikniśo na trendowu liniju, aby informacije w statusowej rědce wiźeł.

Aby rownicu trendoweje linije pokazał, wubjeŕśo trendowu liniju w diagramje, klikniśo z pšaweju tastu, aby kontekstowy meni wócynił, a wubjeŕśo Rownicu trendoweje linije zasajźiś.

Aby format fódnotow změnił (mjenjej signifikantnych městnow abo wědomnostnu notaciju wužywaś), wubjeŕśo rownicu w diagramje, klikniśo z pšaweju tastu, aby kontekstowy meni wócynił a wubjeŕśo Rownicu trendoweje linije formatěrowaś… – Rejtarik: Licby.

Standardna rownica x ako abscisowu wariablu wužywa a f(x) ako ordinatowu wariablu. Aby toś te mjenja změnił, wubjeŕśo trendowu liniju, pón Format – Wuběrk formatěrowaś… – Rejtarik: Typ a zapódajśo mjenja do tekstoweju pólowu Mě wariable X a Mě wariable Y.

Aby koeficient póstajonosći R² pokazał, wubjeŕśo rownicu w diagramje, klikniśo z pšaweju tastu, aby kontekstowy meni wócynił a wubjeŕśo R² zasajźiś.

Typy trendowych linijow

Slědujuce regresijne typy su k dispoziciji:

• Linearna trendowa linija: regresija pśez rownicu y=a·x+b. Wótrězk b dajo se wunuźiś.

• Polynomialna trendowa linija: regresija pśez rownicu y=Σ_i(a_i∙xⁱ). Wótrězk a₀ dajo se wunuźiś. Stopjeń polynoma musy dany byś (nanejmjenjej 2).

• Logaritmiska trendowa linija: regresija pśez rownicu y=a∙ln(x)+b.

• Eksponencialna trendowa linija: regresija pśez rownicu y=b∙exp(a∙x). Toś ta rownica jo z y=b∙m^x za m=exp(a) ekwiwalentna. Wótrězk b dajo se wunuźiś.

• Potencowa trendowa linija: regresija pśez rownicu y=b∙x^a.

• Pógibliwy pśerězk ako trendowa linija: jadnory pógibliwy pśerězk se z n pjerwjejšnymi y-gódnotami woblicujo, pśi comž n jo perioda. Rownica njejo za toś tu trendowu liniju k dispoziciji.

Wobgranicowanja

Woblicenje trendoweje linije jano datowe póry ze slědujucymi gódnotami zapśimujo:

• Logaritmiska trendowa linija: Jano pozitiwne x-gódnoty se zapśimuju.

• Eksponencialna trendowa linija: Jano pozitiwne y-gódnoty se zapśimuj, snaźkuli wšykne y-gódnoty su negatiwne: Regresija pón rownicy y=-b∙exp(a∙x) slědujo.

• Potencowa trendowa linija: Jano pozitiwne x-gódnoty se zapśimuju; jano pozitiwne y-gódnoty se zapśimuju, snaźkuli wšykne y-gódnoty su negatiwne: Regresija buźo pón rownicy y=-b∙x^a slědowaś.

Pśetwóŕśo swóje daty wótpowědnje; nejlěpjej źěłaśo z kopiju originalnych datow a pśetwórjujośo kopěrowane daty.

Parametry w Calc woblicyś

Móžośo teke parametry z pomocu slědujucych funkcijow Calc woblicyś.

Linearna regresijna rownica

Linearna regresija rownicy y=m*x+b slědujo.

m = PÓSTUP(Daty_Y;Daty_X)

b=WÓSKOWÓTRĚZK(Daty_Y ;Daty_X)

Woblicćo koeficient póstajonosći pśez

r² = MĚRAPÓSTAJONOSĆI(Data_Y;Data_X)

Mimo togo m, b a r² pólna funkcijaRGP pśidatnu statistiku za regresijnu analyzu dodawa.

Rownica logaritmiskeje regresije

Logaritmiska regresija rownicy y=a*ln(x)+b slědujo.

a = PÓSTUP(Daty_Y;LN(Daty_X))

b=WÓSKOWÓTRĚZK(Daty_Y ;LN(Daty_X))

r² = MĚRAPÓSTAJONOSĆI(Data_Y;LN(Data_X))

Eksponencialna regresijna rownica

Za eksponencialne trendowe linije se pśetwórjenje do linearnego modela wótměwa. Optimalne kśiwankowe pśiměrjenje se na linearny model póśěgujo a wuslědki se wótpowědnje interpretěruju.

Eksponencialna regresija rownicy y=b*exp(a*x) abo y=b*m^x slědujo, kótaraž se do ln(y)=ln(b)+a*x resp. ln(y)=ln(b)+ln(m)*x pśetwórjujo.

a = PÓSTUP(LN(Daty_Y);Daty_X)

Wariable za drugu wariaciju se tak woblicuju:

m = EXP(PÓSTUP(LN(Data_Y);Data_X))

b=EXP(WÓSKOWÓTRĚZK(LN(Daty_Y);Daty_X))

Woblicćo koeficient póstajonosći pśez

r² = MĚRAPÓSTAJONOSĆI(LN(Daty_Y);Daty_X)

Mimo togo m, b a r² pólna funkcijaRKP pśidatnu statistiku za regresijnu analyzu dodawa.

Potencowa regresijna rownica

Za kśiwanki potencoweje regresije se pśetwórjenje do linearnego modela wótměwa. Potencowa regresija rownicy y=b*x^a slědujo, kótaraž se do ln(y)=ln(b)+a*ln(x) pśetwórjujo.

a = PÓSTUP(LN(Daty_Y);LN(Daty_X))

b=EXP(WÓSKOWÓTRĚZK(LN(Daty_Y);LN(Daty_X))

r² = MĚRAPÓSTAJONOSĆI(LN(Daty_Y);LN(Daty_X))

Polynomialna regresijna rownica

Za kśiwanki polynomialneje regresije se pśetwórjenje do linearnego modela wótměwa.

Napórajśo tabelu ze słupami x, x², x³, …, xⁿ, y až k póžedanemu stopnjoju n.

Wužywajśo formulu =RGP(Daty_Y, Daty_X) z dopołnym wobceŕkom x do xⁿ (bźez nadpismow) ako Daty_X.

Prědna smužka wudaśa RGP koeficienty regresijnego polynoma wopśimujo, z koeficientom xⁿ cele nalěwo.

Prědny element tśeśeje smužki wudaś RGP jo gódnota r². Glejśo funkciju RGP za drobnostki wó pšawem wužywanju a wujasnjenje drugich wudaśowych parametrow.