Cele pomjeniś

Dowólone mjenja

Mjenja w Calc mógu pismiki, numeriske znamuška a pódsmužku wopśimowaś. Mjenja muse se z pismikom abo pódsmužku zachopiś.

Dowólone wósebne znamuška:

• pódsmužka (_)

Mjenja njesměju te samske ako za celowe póśěgi byś. Mě A1 na pśikład jo njepłaśiwe, dokulaž A1 jo celowy póśěg za celu nalěwo górjejce.

Mjenja njesměju se z pismikom C abo R slědowanym pśez licbu zachopiś; teke jadnotliwej znamušce C a R njejstej ako mjeni dowólonej. Glejśo funkciju ADRESA za dalšne informacije.

Mjenja za celowe wobceŕki njesměju prozne znamjenja wopśimowaś. Prozne znamjenja su w mjenjach za tabele a dokumenty dowólone.

Cele a wobceŕki pomjeniś

Dajśo wobceŕkam mjenja, aby póśěgi na cele a celowe wobceŕki w formulach spóznajobne cynił. Móžośo na pśikład wobceŕk A1:B2 start pomjenjowaś. Móžośo pón formulu ako na pśikład„=SUMA(start)“ pisaś. Samo gaby smužki abo słupy zasajźił abo wulašował, LibreOffice wobceŕki, kótarež se pó mjenju identificěruju, korektnje pśipokazujo. Mjenja wobceŕkow njesměju prozne znamjenja wopśimowaś.

Jo na pśikład wjele lažčej, formulu za nadgódnotowy dank cytaś, jolic móžośo „=suma * dankowa sajźba“ město „=A5 * B12“ pisaś. W toś tom paźe pomjenjujośo celu A5 „Suma“ a celu B12 „Dankowa sajźba“.

Wužywajśo dialog Mjenja definěrowaś, aby mjenja za formule abo źěle formulow definěrowaś, kótarež cesto wužywaśo. Aby wěste wobceŕkowe mjenja pódał,

1. Wubjeŕśo celu abo celowy wobceŕk a pón Tabela – Pomjenjone wobceŕki a wuraze – Definěrowaś…. Dialog Mjenja definěrowaś se zjawijo.

2. Zapódajśo mě wubranego wobceŕka do póla Mě. Klikniśo na Pśidaś. Nowo definěrowane mě se w lisćinje dołojce zjawijo.

Móžośo teke druge celowe wobceŕki w toś tom dialogu pomjeniś, gaž mě do póla zapódawaśo a pón wótpowědne cele wuběraśo.

Jolic mě do formule zapódawaśo, wiźiśo, za tym až sćo zapódał prědne znamuška, mě ako pokaz.

• Tłocćo tastu Enter, aby mě z pokaza pśewzeł.

• Jolic se wěcej ako jadno mě ze samskim pismikom zachopina, móžośo z pomocu tastow + tabulator (↹) a slědk Umsch (⇧) + + tabulator (↹) kulnuś.

Formule pomjeniś

Móžośo dłujkemu abo kompleksnemu formulowemu wurazoju jadnorjejše abo popularnjejše mě pśipokazaś.

1. Wubjeŕśo Tabela – Pomjenjone wobceŕki a wuraze – Definěrowaś…. Dialog Mě definěrowaś se zjawijo.

2. Zapódajśo mě za formulowy wuraz do póla Mě.

3. Zapódajśo formulowy wuraz do póla Wobceŕk abo formulowy wuraz. Jolic na pśikład sćo pomjenił swóju formulu HYP, móžośo wuraz KÓRJEŃ(A1*A1 + B1*B1) zapódaś, aby wótkłon mjazy dwěma dypkoma na płoninje wulicył. Njezachopinajśo wuraz ze znamuškom rownosći (=).

4. Klikniśo na Pśidaś. Nowo definěrowane mě se w slědujucej lisćinje zjawijo. Klikniśo na W pórěźe, aby dialog zacynił.

5. Zapódajśo mě pomjenjoneje formule do póžedaneje cele. Celowa gódnota jo wuslědk formulowego wuraza. Zapódajśo na pśikład =HYP(), aby formulu górjejce wulicył. Źiwajśo na to, až njamóžośo parametry direktnje pomjenjonym formulam pśepódaś.