Daty konsoliděrowaś

Pśi konsoliděrowanju se wopśimjeśe celow z rozdźělnych tabelow na jadnom městnje kombiněrujo.

Aby celowe wopśimjeśe kombiněrował:

1. Wócyńśo dokument, kótaryž celowe wobceŕki wopśimujo, kótarež se maju konsoliděrowaś.

2. Wubjeŕśo Daty – Konsoliděrowaś…, aby dialog Konsoliděrowaś wócynił.

3. Wubjeŕśo z póla Wobceŕk žrědłowych datow žrědłowy celowy wobceŕk, aby jen z drugimi wobceŕkami konsoliděrował.

   Jolic wobceŕk njama mjenja, klikniśo do póla pódla Wobceŕk žrědłowych datow. Blinkajucy tekstowy kursor se zjawijo. Zapódajśo póśěg za prědny wobceŕk žrědłowych datow abo wubjeŕśo wobceŕk z myšku.

4. Klikniśo na Pśidaś, aby wubrany wobceŕk do póla Konsoliděrowańske wobceŕki zasajźił.

5. Wubjeŕśo pśidatne wobceŕki a klikniśo na Pśidaś pó kuždem wuběrku.

6. Wubjeŕśo celowy wobceŕk z póla Wuslědki kopěrowaś, aby pódał, źož se ma wuslědk pokazaś.

   Jolic celowy wobceŕk njama mě, klikniśo do póla pódla Wuslědki kopěrowaś a zapódajśo póśěg celowego wobceŕka. Móžośo pak teke wobceŕk z myšku wubraś abo kursor do cele górjece nalěwo w celowem wobceŕku stajiś.

7. Wubjeŕśo funkciju z póla Funkcija. Funkcija pódawa, kak se gódnoty konsoliděrowańskich wobceŕkow zwězuju. Funkcija „Suma“ jo standardne nastajenje.

8. Klikniśo na W pórěźe, aby wobceŕki konsoliděrował.

Pśidatne nastajenja

Klikniśo na Wěcej w dialogu Konsoliděrowaś, aby pśidatne nastajenja pokazał.

• Wubjeŕśo Ze žrědłowymi datami zwězaś, aby formule zasajźił, kótarež wuslědki w celowem wobceŕku generěruju a nic wopšawdne wuslědki. Jolic daty zwězujośo, se w žrědłowem wobceŕku změnjone gódnoty w celowem wobceŕku awtomatiski aktualizěruju.

  Wótpowědne celowe póśěgi w celowem wobceŕku se w zasobu slědujucych smužkach zasajźuju, kótarež se awtomatiski rěduju a pón chowaju. Jano kóńcny wuslědk se na zakłaźe wubraneje funkcije pokazujo.

• Wubjeŕśo pód Konsoliděrowaś pó pak Smužkowe pópisanja abo Słupowe pópisanja, jolic cele wobceŕka žrědłowych datow njamaju se pó identiskej poziciji cele we wobceŕku konsoliděrowaś, ale město togo pó wótpowědnem smužkowem abo słupowem pópisanju.

  Aby pó smužkowych abo słupowych pópisanjach konsoliděrował, musy pópisanje we wubranych žrědłowych wobceŕkach wopśimjone byś.

  

  Tekst w pópisanjach musy identiski byś, aby smužki abo słupy daju se pšawje pśirědowali. Jolic smužkowe abo słupowe pópisanje žednomu wótpowědujo, kótaryž w celowym wobceŕku, buźo se ako nowa smužka abo nowy słup pśipowjesyś.

  
  

Daty z konsoliděrowańskich wobceŕkow a celowego wobceŕka se składuju, gaž dokument składujośo. Jolic pózdźej dokument wócynjaśo, w kótaremž jo se konsolidacija definěrowała, budu te daty zasej k dispoziciji.