Exportar a HTML - Páxina 2

Determina o tipo de publicación.

Pode indicar se desexa incluír marcos, crear un título ou mostrar notas de presentación.

Tipo de publicación

Indica a configuración básica para a exportación pretendida.

Formato HTML estándar

Crea páxinas HTML estándar a partir de páxinas de exportación.

HTML estándar con marcos

Crea páxinas HTML estándar con marcos. A páxina exportada sitúase no marco principal e o marco da esquerda mostra un índice en forma de hiperligazóns.

Crear portada

Crea unha portada para o documento.

Indica que se mostren tamén as súas notas.

Automático

Crea unha presentación HTML predefinida como unha exportación de quiosco, en que as diapositivas avanzan automaticamente despois dun tempo determinado.

Como indicado no documento

A transición da diapositiva depende do intervalo que defina na presentación para cada diapositiva. Se define unha transición manual de páxina, a presentación HTML introduce unha nova páxina ao premer calquera tecla.

Automático

A transición de páxinas faise automaticamente tras o tempo especificado e non depende do contido da presentación.

Duración da presentación

Define o tempo de exhibición de cada diapositiva.

Continuo

Reinicia automaticamente a presentación HTML despois da exhibición da última diapositiva.

WebCast

Nunha exportación a WebCast xéranse scripts automáticos con compatibilidade con Perl ou ASP. Isto permite que o falante (por exemplo, un falante nunha conferencia telefónica que empregue unha presentación de diapositivas na Internet) cambie as diapositivas nos navegadores web da audiencia. Pode atopar máis informaicón sobre WebCast máis abaixo nesta sección.

ASP (Active Server Pages)

Se selecciona a opción ASP , a exportación WebCast crea páxinas ASP. Teña en conta que as presentacións HTML só as ofrecen servidores web con soporte para ASP.

Perl

Utilizado pola exportación WebCast para crear páxinas HTML e scripts Perl.

URL para ouvintes

Indica o URL (absoluto ou relativo) que debe introducir o usuario para ver a presentación.

URL para presentación

Indica o URL (absoluto ou relativo) onde se gardou a presentación HTML creada no servidor web.

URL para scripts en Perl

Indica o URL (absoluto ou relativo) para os scripts en Perl xerados.

Máis información sobre a exportación WebCast

Existen dúas opcións para a exportación de presentacións do Impress do LibreOffice mediante a tecnoloxía WebCast: ASP (Active Server Pages) e Perl.

WebCast en ASP

Exportación

• Para exportar a ASP, nun documento do Impress do LibreOffice escolla Ficheiro - Exportar. Verá o diálogo Exportar, no que ha de seleccionar Documento HTML como tipo de ficheiro. Unha vez seleccionado un directorio e introducido un nome de ficheiro, prema en Exportar. Para exportar como ASP recomendamos seleccionar un nome de ficheiro «secreto» para o ficheiro en HTML (vexa máis abaixo para máis detalles). Nese momento verá o diálogo Exportar a HTML. No directorio que acaba de seleccionar escríbense varios ficheiros.

• O presentador utiliza o nome do ficheiro introducido para cambiar as diapositivas vistas polo público. Pode gardar os ficheiros de WebCast tanto localmente como directamente nun servidor de HTTP. Despois pode transferir a través de FTP ficheiros gardados localmente no servidor de HTTP. Teña en conta que WebCast só funciona se os ficheiros se solicitan desde un servidor de HTTP.

Non utilice o mesmo cartafol para dúas exportacións de HTML diferentes.

• Seleccione WebCast como tipo de publicación na segunda páxina do asistente de exportación a HTML.

• Na área de opcións de WebCast, seleccione a opción ASP (Active Server Pages). Agora pode continuar a configuración ou iniciar a exportación premendo no botón Crear.

Uso de WebCast ASP

Pode usar WebCast cando sexa posíbel acceder aos ficheiros de exportación desde un servidor de HTTP.

Exemplo:

Supoñamos que instalou Microsoft Internet Information Server no no seu computador. Introduciu o cartafol «c:\Inet\wwwroot\presentacion» como cartafol de saída de HTML durante a instalación de IIS. O URL do seu computador é: «http://omeuservidor.gal».

• Gardou os ficheiros creados durante o proceso de exportación no cartafol c:\Inet\wwwroot\presentacion\. Nese cartafol, a exportación crea un ficheiro HTML que pode nomearse, por exemplo, «segredo.htm». Introduciu ese nome na caixa de diálogo Explorar (vexa arriba). Agora o presentador pode explorar os ficheiros de exportación de HTML introducindo o URL http://omeuservidor.gal/presentacion/segredo.htm en calquera explorador de HTTP que teña compatibilidade con JavaScript. O presentador pode, entón, modificar a páxina a través dalgúns controis de formulario.

O público pode ver a diapositiva seleccionada polo presentador a través do URL http://omeuservidor.gal/presentacion/webcast.asp. Non é posíbel ir a outras diapositivas localizadas neste URL, a non ser que se coñezan os nomes dos ficheiros. Asegúrese de que o servidor de HTTP non mostre a lista de cartafoles.

WebCast a través de Perl

Exportación

• Para exportar desde documentos de Impress do LibreOffice, escolla Ficheiro - Exportar. Ábrese a caixa de diálogo Exportar, onde selecciona Documento HTML como formato de ficheiro. Despois de seleccionar o cartafol e introducir un nome de ficheiro, prema en Exportar. Aparece entón o asistente de exportación de HTML. Desta maneira grávanse varios ficheiros no cartafol seleccionado.

• O nome de ficheiro introducido úsao o presentador para cambiar de diapositivas. Seleccione un cartafol baleiro.

• Na segunda páxina de Exportar HTML, seleccione WebCast como tipo de publicación.

• Na área de opción de WebCast, seleccione Perl.

• Na caixa de texto URL para ouvintes, introduza o nome de ficheiro do documento HTML que vai usar a audiencia. Na caixa de texto URL para presentación, introduza o cartafol que vai usar para a presentación e, na caixa de texto URL para scripts Perl, o URL do cartafol de scripts CGI. Pode definir a configuración adicional nas páxinas seguintes do asistente ou iniciar o proceso de exportación premendo no botón Crear.

Uso de WebCast Perl

Os ficheiros creados durante a exportación teñen que configurarse no servidor de HTTP compatíbel con Perl. Isto non pode facerse automaticamente debido á variedade de servidores HTTP con soporte Perl. Os pasos que debe seguir descríbense a continuación. Consulte o manual do servidor ou pregunte ao administrador de rede como aplicar eses pasos no servidor.

• Primeiro debe mover os ficheiros creados durante a exportación aos cartafoles correspondentes no servidor de HTTP.

• Mova os ficheiros con extensións htm, jpg e gif ao cartafoles do servidor deHTTP indicado na caixa de texto URL para presentación.

• É preciso mover todos os ficheiros con extensións pl e txt ao cartafol do servidor de HTTP indicado na caixa de texto URL para scripts Perl. Este cartafol debe configurarse de modo que as scripts Perl que conteña tamén podan executarse mediante unha solicitude de HTTP.

• Nos sistemas UNIX debe conceder aos ficheiros con extensión pl o permiso de execución mediante servidor de HTTP. Isto faise, normalmente, coa orde chmod. Os permisos do ficheiro currpic.txt deben configurarse de modo que o servidor de HTTP teña dereitos de escritura.

Agora debería poder utilizar WebCast.

Exemplo:

Neste exemplo, vostede dispón dun computador Linux cun servidor de HTTP. O URL do seu servidor de HTTP é http://omeuservidor.gal e o cartafol de saída dos seus documentos HTML é //user/local/http/. As súas scripts Perl localízanse no cartafol //user/local/http/cgi-bin/. Introduza segredo.htm como nome do ficheiro de exportación e presentacion.htm como o URL para ouvintes. Na caixa de texto URL para presentación, teclee http://omeuservidor.gal/presentacion/; na caixa de texto URL para scripts Perl, introduza http://omeuservidor.gal/cgi-bin/.

• Agora, copie todos os ficheiros *.htm, *.jpg e *.gif dos cartafoles especificados durante a exportación no cartafol //user/local/http/presentacion/ do seu servidor de HTTP e copie todos os ficheiros con extensión *.pl e *.txt no cartafol //user/local/http/cgi-bin/.

• Inicie a sesión como usuario raíz e acceda ao cartafol //user/local/http/cgi-bin/. Pode definir os dereitos correspondentes utilizando a orde chmod.

O presentador pode realizar a presentación cando conclúa a instalación dos ficheiros Perl. Os ouvintes poden ver esa presentación no URL http://omeuservidor.gal/presentacion/presentacion.htm.